Jumat, 28 November 2014
Banjarmasin Post

Rihal ka Muha

Selasa, 26 Juni 2012 01:49 WITA

Rihal ka Muha
Dok
Ilustrasi Palui
PALUI wan Tulamak bakawan kada hanyar ini haja, tapi sudah akrab matan halus. Nangkaya itu jua wayah bujang, bubuhannya ini sama mangaji Alip-alipan hingga sampai ka Qur’an, belajar wan Ustad Haji Abulasan. Kakawanannya mangaji itu, di antaranya ada jua babinian.

Hari itu ustad Haji Abulasan tulak malacak banih ka pahumaan wan anak bini sidin. Ayu haja ikam-ikam magaji di rumah ini, kaina kami bulikan jua, ujar sidin.

Inggih, guru ai, ujar Palui, Tulamak dan lainnya kasukaan, karena bila ustad kadada, ba-arti buhannya ini bibas sagala-galanya.

Pindik carita, sambil mahada_pi rihal wan kitab suci, lalu mambaca bismillah, Palui pura-pura membaca: Ba di atas ba, nun dua dapan nun... baa...nun! Uma ai, cilakanya ikam Lui, ujar Salamah manyala sambil manapak lantai. Banun itu ngaran umaku, aku kada rila kalu umaku di sambat-sambat di sini!

Maaf Mah-ai, aku mambaca di kitab Alipan ini, kada sing haja tasambat uma ikam, ujar Palui bila diri takarinyum. Salamah kada mau kalah, lalu membalas membaca: Ba mati ha, di atas bah, lam mati lam badapan lul... bahlul, ujar Salamah.

Nah si Bahlul itu ialah abahmu. Lui-ai. Lik mainnya satu-satu! ujar Tulamak sahingga badarau tatawaan kawanan lainnya.

Palui tatap kada hakun bakalah. Inya pura-pura mambaca ayat sambil balagu: Umai Salamah mun ikam hakkun wan diaku, kaina ikam kutukarakan....tas furuuuun!.

Jauhkan bala, nau zubillah,... aku kahada rigi wan tas purun, Lui-ai, ujar Salamah menjawab, kasarikan. Tulamak wan kawan-kawannya jadi bingung, kaya apa ma-ampihi perang Palui wan Salamah ini, kuatir kalu sampai terjadi bakalahian.

Lalu Tulamak banganga handak ba ucap, tapi ditantang ulih Palui.

Ayu ha Tulamak! sambil balagu kaya mambaca ayat suci. Mun ikam campur managuri akuuuu.....awas ini rihal kamuhaaaa! ujar Palui balagu nang kaya Qari jemputan. Kontan Tulamak wan kawan-kawan mengalakak tatawaan.

Haratan tatawaan itu, kada disangka-sangka, cangul pak Ustad matan dalam. Sidin sampat mandangar, lalu mangacak ka bahu Palui wan Tulamak, mamulas talinga kaduanya.

Kaina ikam kupadahkan wan uma abah ikam, handak tarus mangaji atawa baampih. Ini badusa ganal, mauluulu di hadapan Qur’an, ujar Pa Ustad. Sidin langsung ma-ambil rihal dan ma-ucungkan ka muha Palui:

Inikah rihal ka muha? ujar sidin.

Ampun guru ai, kami hilap kami tatap mangaji wan pian, ujar Palui basisigan. Nah..... ikam harus batobat kepada Allah dan janji kada lagi ma-ulangi kalakuan nang kada baik ini, ujar sidin. (tam)
Editor: Dheny

TRIBUNnews.com © 2014

About Us

Help

Atas