Kanker Payudara

SABAN Sabtu, di balai desa pasti hibak wan bubuhan bibinian ibu-ibu warga kampung. Bila Sabtu dahulunya acara baarisan, Sabtu tadi baacaraan demo mamasak, maka hari Sabtu ini bubuhan ibu-ibu diundang bini camat gasan mendangarakan caramah ibu doktur. Tamasuk bini Palui wan bini Garbus umpat jua hadir.

Nah ibuibu sakalian, bulan samalam saya sudah manjalaskan tentang pantingnya ASI gasan bayi. Maka hari ini kita akan mambahas tentang panyakit kangker nang rancak terjadi pada kita kaum perempuan,” ujar dr. Ida mamulai caramahnya.

Payudara itu napa.bu? takun salah seurang nang hadir.

Umailah, ngalihnya ulun menjawab, ujarnya takarinyum sambil ba urut ka dada. Ini nah bu-ai,ampun kita nang dua biji ini, ngarannya payudara alias sapasang susu. Lalu badarau ditatawakan buhannya.

Ui...ding! ujar bini Palui umpat manyala pandir, Kaina dirumah takunakan wan laki, napa arti payudara, pasti kumplit panjalaskannya, disambut tatawa kalakakan para hadirat lainnya.

Imbah bubaran lalu bulikan ka rumah, maka bini Palui wan bini Garbus, masing masing bakisah ka lakinya tantang isi caramah tersebut.

Ulun abahnya-ai mandangar dari dokter nang bacaramah tadi, bahwa penyakit kanker payudara itu bisa membawa umur. Sudah banyak kurbannya dibanua kita ini. Ulun takutan, abahnyaai.

Caaah, kada usah talalu gair, umanya-ai. Penyakit kanker itu ialah sakit Kantung Kering alias kekurangan pitamin D. (Duit)....ha-ha...ha! Palui tatawa mangalakak.

Ulun harap sampian jangan ma-ulu-ulu, abahnyaai. Talinga ulun saurang mandangar panjalasan doktur saoal kanker, ujar bininya makin sarius. Ulun ini tadi bapariksa wan Dr.Ida, kaya apa susu ulun nang sabalah kiwa ini, nang rancak sakit bila dijapai. Ujar doktur, sakit ulun ini lantaran rancak dikacak-kacak.

Talalu rancak di kacak, ujar dotur bisa jadi kanker payudara nang bisa membawa maut.

Tadiam mandam Palui mandangar ucapan bininya. Nang bini ba ucap pulang. Makanya abahnya-ai, lalaki nang kaya sampian ini saraba salah. Amun lambat dibari lalu manyanyarik maraju. Apabila dibari satu handak dua, malahan malupa diri, pisang susu diulah pisang kacakan.

Umai......jangan talalu manumpalak aku, umanya-ai. Mimang dasar pisang ikam jua mambari kapingin, salagian ikam jua kaya mamiragahkan wan diaku sahingga liurku batitikan, jadi artinya kita sama salah, sama-sama bujur. Ampun ikam itu nang ma-ulah aku garigitan, umanya-ai...ih, ading ai, ujar Palui ma-ungahi bininya. (bpt/rep)