Si Palui: Sanayan Kamis

Dalam tiga bulan ne Palui mulai barajin baibadat, terutama salat bajamaah kada handak lagi inya tatinggal, kaya apa haja sibuknya

Si Palui: Sanayan Kamis
BPost Cetak
Ilustrasi palui 

KAHIDUPAN wan panghidupan sudah kada kaya urang, di luang satu haja baumuran, kalunya pagawai nagari itu, jadi tukang sapu wan maantar surat sampai pangsiun, kasihan abah pimpinan daerah ya, kalihatannya si Palui.

“Apa Lui ikam jadi tukang sapu haja baumuran, maka sudah diangkat pamarintah daerah jadi pagawai nagari?” takun Garbus ka Palui.

“Itulah kanyataannya Bus ai, ini gin gawianku jadi tukang sapu alias istilah Inggrisnya cleaning service barabut nang handak wayah ne,” sahut Palui pina sarik ka Garbus.

“Oh tasinggungkah ikam Lui, minta maaf ai akulah ?” Garbus muhun maaf kalu Palui pina tasinggung.

“Mun kita bakawalan ne Lui ai, kada usah basisinggungan, itu sabanarnya Garbus batakun, lawasnya ikam ne sudah jadi tukang sapu, kawalah handak naik pangkat jadi tukang ketik suratkah di kantur tata usaha,” Tulamak umpat bapander.

“Aku ne tahu diri pang Mak ai, Garbus ai,hanya ijazah Paket B, SMP gin kada tamat bahari, jadi bamudal otot nang kuat haja, kada bisa mangatik kumputer, tahunya bakakarik ratik tiap hari, jadi kada parlu jua duduk di kantur mangatik kumputer kaya urang tamatan sarjana, iya kada buhannya?” Palui manjalasakan.

“Iya sudah Palui nih,” jawab Tulamak bajauh pada Palui.

Karana kalah dalam kahidupan maka Palui bainisiatip jua supaya ada pina labihnya wan kakawalan sasama tukang sapu atau karyawan lainnya. Sual kaagamaan barang inya manang, itu harus dipegang bujur-bujur.

Dalam tiga bulan ne Palui mulai barajin baibadat, terutama salat bajamaah kada handak lagi inya tatinggal, kaya apa haja sibuknya diusahakan hadir di masjid.

Palui Senayan Kamis

Kamudian puasa sunat hari Sanayan wan Kamis digawinya jua ulih Palui maski gawian barat buhan tukang sapu ne, inya batekad kawa manggawinya.

”Aku ne umanya ai sudah kalah wan urang lain, urang bagawi satumat kawa manukar mutur, satumat jadi pagawai kawa jadi kapala unit, akhirnya jadi kapala OPD (Organisasi Perangkat Daerah), samantara aku ya baumuran jadi tukang sapu, ulih karana itu aku bahimat jua baibadat terutama salat wajib kuusahakan bajamaah tarus ka masjid atau wan ikam bahanu di rumah bajamaah,” ujar Palui bapanderan ka bininya.

“Ayuja abahnya ai, kada apa-apa ulun biar pun kalah dalam urusan dunia, tapi kita harus manang dalam urusan akhirat kaya itu kalu abahnya?” sahut bini Palui mangarti posisi laki.

“Nah malam ne dinihari garak aku umanyalah, handak makan sahur puasa sunat Sanayan,” ujar Palui.

“Akur abahnya ai,” bini Palui lihum.

“Tapi sabuting jangan tagarak utuh gundul bayanya am bangun, tapaksa mandi kena sabalum imsak,” sahut Palui, takulibi sakalinya nang bini. (aan maulana/anggota Dewan Kesenian HSS)

Editor: BPost Online
Ikuti kami di
KOMENTAR
TRIBUNnews.com Network © 2017
About Us
Help