Si Palui: Full Day School

Ada parubahan jadwal balajar di sakulahan Palui dalam sabulanan ne. Dahulu bulikan jam dua siang, wayah ne bulikan jam lima kamarian.

Si Palui: Full Day School
BPost Cetak
Ilustrasi palui 

ADA parubahan jadwal balajar di sakulahan Palui dalam sabulanan ne. Dahulu bulikan jam dua siang, wayah ne bulikan jam lima kamarian. Jadi, sampai di rumah bila rumah jauh dari sakulahan misalnya bulik ka Rantau jam anam hanyar sampai ka rumah.

”Napa Lui kada tampil lagi di masjid Quba bila salat Asar, kamana haja ikam?” takun Tulamak.

“Aku banyak di sakulahan Mak ai, jam lima hanyar bulikan, istilah wayah ne full day school, jadi Zuhur wan Asar salat bajamaah wan murid di musala sakulahan,” sahut Palui sarius.

“Umailah barapa jam murid balajar dalam sahari?” Tulamak manambahi.

“Kalu dahulu dalapan jam palajaran, wayah ne jadi 13 jam palajaran. Jam lima ya hanyar bulikan,” Palui malanjutakan.

Sabulan sudah bajalan lima hari sakulah dalam saminggu. Sabalum diterapakan masing-masingnya katuju, karana cagar hari Sabtu, hari Ahad peray jadi dua hari tatitir peray nya, asiik ujar guru-guru waktu itu. Eh sakalinya banyak murid wan guru mangaluh kalapahan, sabab parayan katiga baulanjaan pula buhan murid. Asal 10 ribu baulanja jadi 15 ribu baulanjanya. Bila jam dua sampai jam lima murid wan guru banyak nang manguap di kalas.

”Napa Lui ikam balukup di meja guru dalam kalas tujuh, ada apa ya maka kaya nitu mangajarnya, wan murid umpatan jua lukup-lukupan?” takun kapala sakulah ka Palui nang mancek ka kalas-kalas.

“Ulun mangantuk banar Pak ai, biasa guring antara jam dua sampai satangah ampat nitu?” sahut Palui ringan haja.

“Bah iya pang Lui lah, kita ne harus fit tarus dari jam 07.30 sampai jam lima kamarian, mun handak tarus jadi guru ya ikam ne,” kepsek habang muha.

“Minta maaf Pak lah, ulun dasar kamangantukan, mangaruh, saku ulun Pak lah?” sahut Palui sambil manunduk muha.

Halaman
12
Editor: BPost Online
Ikuti kami di
KOMENTAR
TRIBUNnews.com Network © 2017
About Us
Help