BanjarmasinPost/

Si Palui: Naik Jabatan

“Sama haja pang ya, julaku dahulu camat Bakarung naik jabatan jadi camat Gunung Hamak, iya kada Bus?” Palui indah kalah.

Si Palui: Naik Jabatan
Bpost/dok
Ilustrasi Palui 

BILA Palui sapakawalan batamuan masing-masingnya maungkai kesah atau pamanderan.”Pamanku Lui ai nang bangaran Paman Fuad , dahulu jadi camat Padang Paring, naik jabatan sidin jadi camat Gunung Batu Ampar, iya kada?” ujar Garbus ka Palui.

“Sama haja pang ya, julaku dahulu camat Bakarung naik jabatan jadi camat Gunung Hamak, iya kada Bus?” Palui indah kalah.

“Kalau adingku buhannyalah, dahulu bagawi di daerah karing di wilayah kuta, wayah ne diandak di wilayah basah, Bajayau, itu ya naik jabatan jua karana daerah basah ne banyak nang handak diandak ka situ iya kada?” Tulamak indah sakalinya jua.

Buhannya bapanderan nitu mandangar katua RT nang rahatan lagi asik baca koran di ambin rumah sidin jua.

”Ayuha aku bakalah manjalasakan buhannyalah, nang dimaksud naik jabatan nitu, bila saurang camat siapakah dia tarkanal rajin, rumah dinas didiami, loyalitasnya bagus ka atasan, ka masyarakat mangayomi wan ramah tamah, palayanan ka warga kada bertele-tele, kada lawas camat nitu dipindah abah pimpinan daerah ka kuta, nitu ngarannya naik jabatan,” ujar katua RT bapander.

“Ujar ulun tadi pang Pak RT?” takun Palui.

“Bisa hukuman Lui ai, asalnya di banua , dipindah ka wilayah gunung, sidin waktu camat di banua disadiakan rumah dinas kada didiami,limbah tuntung rumah dinas direhabakan, basalamatan manyaru masyarakat eh sakalinya kada didiami, jadi mubajir, sangit ya abah pimpinan daerah, makanya dihukum sidin pindah ka wilayah gunung, kaya apa hakunkah jadi camat atau ampihkah? Di gunung jua masyarakatnya kritis, kada kawa tasalah mangambil kabijakan masuk koran am camat,” sidin manjalasakan pula kabuhannya.

“Kalu dahulu ada istilah camat Arba, bila hari Arba hanya muncul camatnya ka kantur kacamatan di wilayah pagunungan, salabihnya bahinip di kuta haja, macam-macam alasan rapat di kabupatenlah. Tapi wayah ne cuba akan kaya nitu langsung SK barhenti jadi camat. Banyak jar abah pimpinan daerah nang handak jadi camat,” katua RT sarius banar manarangakan.

“Kaya apa Pak RT, dahulu di wilayah karing sakarang dipindah ka wilayah basah, apakah naik jabatan atau hukuman?” takun Tulamak.

“Nah nitu hukuman jua Mak ai, satahuku adingmu nitu bagawi di kuta kada panurun, kawa dihitung dalam sabulan turunnya, makanya kapala OPD nya sangit dipindah sidin ka wilayah basah, dua jam hanyar sampai ka Bajayau nitu matan Kandangan. Itu hukuman ngarannya,” Pak RT tagas banar manjalasakan.Tanganga Tulamak ya?

“Maka kadudukannya basah napa maka tamasuk hukumankah?” takun Palui.

“Salah paham buhan kam ya? Maksud kadudukan basah kaya di instansi nang maurusi duit daerah nitu basah banar disambat buhannya cair tarus hari-hari iya kada. Sabab maingkuti duit tatarusan baik bulan anum atau bulan tuha, iya kalu.” Pak RT mangalakak tatawa.

“Takuni ja buhan aparatur sipil negara handak dimana ikam diandak jawabannya pasti handak di bagian basah? Basah uncuinya Lui ai? lakas sidin maninggalakan buhannya.

“Oh damintukah Pak?” ujar Palui hanyar paham buhannya jua. (aan maulana/anggota Dewan Kesenian HSS)

Editor: BPost Online
Ikuti kami di
KOMENTAR
TRIBUNnews.com Network © 2017
About Us
Help