BanjarmasinPost/

Si Palui : Sakandaraan

“Ulun pang Bah, tamasuk hitungan nang bakurban jua-lah ?”, takun Palui.

Si Palui : Sakandaraan
Bpost/Riza
Ilustrasi Palui 

HARI raya haji tahun ini abah bintuha Palui handak bakurban, sidin manyuruh Palui manukar sapi : “ Ikam cari Nak-ai sapi nang paling ganal sagan kawa kita bakurban sakaluwargaan . Sual haraga kada jadi masalah, nang panting ikam cari sapinya nang paling ganal, Nak-lah !”, pasan bintuha Palui.

“Ulun pang Bah, tamasuk hitungan nang bakurban jua-lah ?”, takun Palui.

“ I-ih ..! Pukuknya kita sakaluwargaan bakurban. Aku wan Uma ikam, badua. Ikam dua laki bini, ditambah anak ikam badua, jadi anam. Hanyar ading ikam Si Bayah wan Nurlaila (ading ipar palui) badua !”, ujar abah bintuha Palui marinci.

“ Mun dintu jumlahnya jadi ‘dalapan urang’, Bah-ai. Sapandangaran ulun ujar guru, saikung sapi atawa hadangan nitu sagan urang ‘batujuh’ haja, Bah-ai ?!”, jar Palui malurusakan pandapat.

“I-ih … itu mun sapinya halus. Makanya-am ikam abah suruh mancari sapi nang paling ganal. Sual haraga barapakah tukari haja, asal sapinya ganal wan lamak-lamaknya,” abah bintuha Palui mangaras.

“Amun ikam asa ragu jua, ikam takunakan-ha ka Tuan Guru. Padahakan bahwa sapi kita tu nang panggaganalnya !”, ujar bintuha Palui pulang malihat muha nang binantu pina bingung. Palui kada wani lagi mahual, inya takutan luku bintuhanya sarik.

Palui minta dangani wan Garbus, sabab gawiannya maujik jadi inya pasti banyak tahu tampat-tampat urang bajual sapi wan kambing kurban. Sasuai pasan abah bintuhanya –satalah tuhuk bakuliling- akhirnya buhannya dapat jua nukar sapi nang bujur-bujur ganal bangat. Sapinya tinggi lamak basar, ujar nang bajual, sapi nitu asal Australia.

Sakarang nang masih bakalangan di utak Palui, bulih-kada sapi nitu gasan bakurban urang ‘badalapan’?! Sabab sapangatahuannya saikung sapi bulih inggan urang batujuh haja. Karna hatinya asa ragu banar, maka inya pun minta gani-i pulang awan Garbus mandatangi Tuan Guru gasan manakunakan hukum nang sabanarnya.

Ujar Garbus, “Satahu aku, sudah matan bahari bila bakurban saikung sapi atawa hadangan, nitu sagan tujuh urang ! Nitu hukumnya sudah kada kawa ditawar-tawar lagi.”

“Tapi supaya abah bintuha ikam puas, Lui-ai .., ayuha aku mandangani ikam batakun ka-alah Tuan Guru “, ujar Garbus sambil manyatatar sapida mutur uijknya.

Halaman
123
Editor: BPost Online
Ikuti kami di
KOMENTAR
TRIBUNnews.com Network © 2017
About Us
Help