BanjarmasinPost/

Si Palui:Mandadak Bulikan

Horee… horre… sampat bulikan,’ kakanakan tadarau berataan. Daur jadinya di tiap-tiap kalas, murid badadas handak bulikan.

Si Palui:Mandadak Bulikan
Bpost/Riza
Ilustrasi Palui 

NGARAN wayah ini banyak hal nang saraba mandadak. Ada jua nang manyambat mandadak sungai, padahal jalas-jalas banyak baisi sungai, karana apa jar, karana banyak urang mamander sungai haja saat ini. Dahulu kadada apa-apanya sungai nitu, dianggap urang tung sampah panjang gasan mambuang ratik atau cagar diuruk jadi lukasi bangunan.

Sakali ini di sakulahan Palui mandadak jua, yaitu mandadak sampat bulikan, inya napa pasalnya, Umpati ha kesah barikut ini; Saharusnya bulikan jam dua, tadi mapakah hari nitu bulikan jam 11, makalahan am ada sariki kapala dinas. Karana kadada kapala sakulah , sidin haur mangikuti panyuluhan UNBK tahun 2018 di kabupaten jadi guru-guru wani sadikit mambuat kabijakan saurang.

Tengg…tengg… tengg.. cagat talinga kakanakan mandangar lonceng talu kali nitu.

”Barhubung hari ini bapak ibu guru handak saruan manyaratus pandiri sakulahan kita ini, maka para siswa silahkan balajar di rumah masing-masing,” ujar Palui lewat pangaras suara sakulahan.

Horee… horre… sampat bulikan,’ kakanakan tadarau berataan. Daur jadinya di tiap-tiap kalas, murid badadas handak bulikan.

Imbah nitu sampai harinya jam dua siang, ada babarapa urang tuha nang datang ka sakulahan takajut.

”Uh… kamanaan kakanakan maka sunyi banar di sakulahan ne!” ujar Tulamak nang maambili anaknya. Untung ada Garbus paman sakulahan nang masih basisimpun wan babarasih di ruang dewan guru jadi kawa ditakuni.”Kamanaan urangnya Bus?’ takun Tulamak.

“Buhan guru wan murid sampat bulikan. Guru-guru saruanan ka urang manyaratus pandiri sakulahan kita ini Mak ai, undangannya hanyar baisukan tadi pang, makanya mandadak bulikan,” ujar Garbus.

“Uh damintukah, kamanakah anakku nah, maka sudah lawas kalu bulikan? Anakku baluman datang lagi ka rumah?” Tulamak pucat.

‘Tadi jam 11 sudah bulikan, aku tatap batinggal di sakulahan kalu ada apakah urang mancarii,” sahut Garbus.

Halaman
12
Editor: BPost Online
Ikuti kami di
KOMENTAR
TRIBUNnews.com Network © 2017
About Us
Help