BanjarmasinPost/

Si Palui: Taat Wan Kawitan

Nitu hanyar sual makanan. Mintu jua mun handak manukar barang, taransfir duitnya, kada saapa barangnya datang.

Si Palui: Taat Wan Kawitan
Bpost/Riza
Iluistrasi Palui

HIDUP di zaman canggih wayah hini ada nyamannya, tapi ada jua ngalihnya. Nyamannya napa-napa saraba paraktis. Handak makan mie tinggal manguhup mie instan, lima manit jadi. Handak makan ka rumah makan atawa warung nang jauh tapi kulir manulaki, tinggal talipun ‘ujik online’, hadangi di rumah haja, satangah jam lagi makanan nang dipasan datang. Tinggal bayari haraga makanan wan ungkus ujiknya. Kalu dihitung-hitung kada larang jua, daripada manulaki saurang. Binsinnya bulang-bulik barapa, balum lagi muha asa hangit basapida mutur, ditambah pulang risiku di jalan nang samarawut. Salah-salah mun parut karuncungan banar sudah, basapida mutur pina guang-gail, mata raum, apa bisa kapuhunan.

Nitu hanyar sual makanan. Mintu jua mun handak manukar barang, taransfir duitnya, kada saapa barangnya datang. Handak baumrah, travelnya banyak barahuy. Handak balibur bajalanan malihat banua urang, hutil atawa pasawatnya tinggal talipun. Pukuknya wayah hini saraba paraktis, tinggal talipun. Handak bayar listrik atawa nukar pulsa, tinggal picik di HP, salasai. Asal nang diandalakan, yakni tabungan atawa dipusitu di bank, kita ada baisian. Mun kadada tabungan atawa dipusitu, kita sing picik-picik, nang timbul tulisan di layar HP : ‘Maaf, tabungan/dipusitu Anda sudah lingis !’

Cuma mimang sakarang ini kita jua harus bahati-hati, sabab nang ngaran panipuan via talipun rahat bangat tarjadi. Salah-salah duit tabungan kita habis diunduh buhannya. Tapi jua nang ngaran kajahatan nitu kada musti via talipun haja, jambrit, bigal, parampukan, panudungan, panculikan dll wayah hini pina umpatan jua bacanggih.

Nitu sababnya Palui mawanti-wanti banar kaalah anak-bininya supaya salalu waspada , hati-hati, jangan langsung parcaya awan urang nang kada kita kanal. Apakah batamuan langsung , apalagi mun kanalnya sakadar via talipun.

“ Abah, ulun pamit handak tulak mangaji, Bah-ai, “ ujar anak Palui nang bangaran Utuh Tipang, murid kalas tiga SD, sambil inya mancium ka tangan kawitannya.

“ Hati-hati di jalan nak-lah,” jar Palui maingati, “Amun sudah tuntung mangaji lakasi bulik ka rumah, jangan basimpang ka mana-mana lagi.”

Bini Palui manahapi,“Ingatakan pasan abah ikam tu, Tuh-lah. Imbah tuntung mangaji jangan langsung bahurunan, bulik ka rumah dulu. Pukuknya mun ada nang mambawa-i, siapakah-siapakah..jangan hakun !! “

Imbah tuntung malajari mangaji, Pak Ustadz manyampaiakan kisah-kisah taladan gasan mancuntuhakan sifat-sifat nang tarpuji awan kakanakan. Jua kisah tantang nikmat Surga bagi urang-urang nang baiman, sarta Naraka bagi urang-urang nang katuju babuat dusa wan kamungkaran. “Nah, anak-anakku sakalian, siapa nang handak umpat ka Surga supaya baacung tangan !” jar Pak Ustadz. Maka murid-murid mangaji nitu asing-asingnya maacung tangan. “Ulun umpat, Pak Ustadz. Ulun umpat !!”, jar buhannya kuriakan. Nang kada baangkat tangan cuma saikung murid, yakni Utuh Tipang, anaknya Palui.

“ Haw.. kanapa ikam Utuh Tipang maka kada maangkat tangan ?!”, takun Pak Ustadz. “ Ikam kada handak umpat ka Surga-kah ?”, ujar Pak Ustadz pulang kada paham.

“ Kada kaya itu pang, Pak Ustadz-ai. Bukannya ulun kada handak umpat ka Surga, cuma ulun dipasani banar ulih uma-abah ulun, amun tuntung mangaji supaya langsung bulik ka rumah. Kada bulih ka mana-mana! Jar sidin biar siapakah-siapakah nang mambawa-i, pukuknya jangan hakun !!,” jalas Utuh ka Pak Ustadz.

Mandangar alasan Utuh tarsabut, sakarang Pak Ustadz pun mangarti sambil takarinyum. “ Uu…,Mun kaya itu kisahnya, ikam ni Utuh Tipang-ai tamasuk jua ‘calun ahli Surga’, karna ikam taat banar awan kawitan !” ( Ifan, sahibul hikayat matan rawasari)

Editor: BPost Online
Ikuti kami di
KOMENTAR
TRIBUNnews.com Network © 2017
About Us
Help