BanjarmasinPost/

Si Palui: Main Bal

“Aku mandukung banar wan usulan Tulamak nitu”, ujar Garbus nang tukang ujik sasambilan jua bajualan madu.

Si Palui: Main Bal
Bpost/Riza
Ilustrasi Palui

DALAM rangka mamariahkan HUT Proklamasi Kamardikaan RI tanggal 17 Agustus, di kalurahan Palui bagana tiap tahun diadakan partandingan sipak bula antarRW. Masing-masing RW mambantuk tim atawa kasablasan. Buhan Palui lima sakawan rutin salalu tapilih mamparkuat tim mawakili RT ‘James Bond-RT 007/RW 045’. Karna ngarannya kasablasan, maka jumlah tim intinya 11 urang, yakni 10 pamain, ditambah saikung panjaga gawang. Samantara 10 ikung lainnya duduk di bangku cadangan.

Saminggu sabalum batanding di babak panyisihan, tim Palui barunding di rumah Tulamak. “Sudara-sudara sakalian,” ujar Palui mambuka rapat malam itu. “Untuk mamapartahakan pusisi tim kita sabagai juara umum nang sudah talu tahun ini kita pagang, maka kita harus bujur-bujur balatih.”

“ Kalu parlu untuk manambah inirgi, kita tiap hari paling tidak mauntal hintalu ayam kampung dua bigi dicampur wan madu,” ujar Tulamak mausulakan (karna inya banyak baharaguan ayam wan itik).

“Aku mandukung banar wan usulan Tulamak nitu”, ujar Garbus nang tukang ujik sasambilan jua bajualan madu.

“ Napa pina mamandir hintalu hayam wan madu, abahnya handak babini pulangkah !” calatuk bini Tulamak matan higa tawing halat. “Ini urusan madu nang lain, umanya-ai !”, kuriak Tulamak manyahuti nang bini.

“ Madu asli anggihku, panambah kajantanan !” ujar Garbus manimpali. Hadirin tatawaan.

“Aku jua ada usul,” jar Tuhalus sambail baacung tangan. “Napa usul ikam Tuhalus ?” ujar Palui manyilahakan. “Kaya inilah Dangsanak barataan. Untuk labih mamantapakan kasablasan kita sabagai juara umum, disamping kita balatih bujur-bujur, aku mausulakan kita bausaha malalui jalan halus, dangan cara ‘manyiwa urang pintar’.“.

“ Tapi nitu cara nang bisa maulah kita syirik !!”, ujar Tuhirang kada satuju.

“Manurutku ini kada syirik. Kita kada manduaakan Tuhan. Kita tatap bausahan dangan balatih bujur-bujur. Jua dangan badu’a awan Tuhan mudahan kita manang. Sadangkan Pak Dukun Cuma maniup-niup bula ka arah gawang musuh kita”, ujar Tuhalus mambila diri.

Karna dari nang hadir saparu satuju, saparunya lagi kada satuju sual ‘urang pintar’ itu, tapaksa usul Tuhalus nitu dilaksanakan jua. “Cuma kita harus baingkut bulat-bulat bahwa sual manang atawa kalah nitu kada lantaran urang pintar nang kita siwa, malainkan katantuan Allah Ta’ala jua adanya”, ujar Palui sabalum manutup rapat malam itu.

Pas waktu partandingan, Tim Palui Cs manampati lapangan subalah Utara, sadangkan lawannya di sabalah salatan. Pusisi main nitu sagra diinfurmasikan ulih Tuhalus wan dukun nang manggawi di rumah. Bagitu parmainan dimulai, tarnyata dasar bujur, bula aur maarah ka salatan tarus. Musuh bilang kalang kabut. Satangah main, Tim Palui manang tiga kusung.

Satalah istirahat turun minum partandingan dilanjutakan. Parmainan samakin saru, Tim musuh rupanya maubah satratigi dan tarnyata cukup manjur. Bagitu paluit tanda ampihan ditiup ulih wasit, skor manjadi sama kuat 3-3 (alias draw !).

Salasai partandingan Tuhalus ancap mandatangi ‘urang pintar’ nang disiwanya. “Manang kalu, Pak Tuhalus !” takun urang pintar alias dukun nitu basamangat. “ Manang dari Hungkung !” ujar Tuhalus manumpalak. “ Draw..sama tiga, Kun-ai !!”. “ Napang bisa sama tiga!”, ujar Pak Dukun kada parcaya. “Maka bulanya kutiup tarus ampah ka sabalah salatan, sampai masuk anam kali !!?”, ujar Pak Dukun asa yakin banar sidin.

“ Bujurai Pa-ai, gawang nang di salatan nitu kamasukan bula ‘anam kali’, Cuma masalahnya satalah satangah main, kami bahurup lapangan. Nang asal kami di lapangan sablah Utara, imbahnya kami bapindah ka salatan !” ujar Tuhalus sambil manggarigit manjalasakan.

“ Uu.. mintukah kisahnya !? Sualnya buhan ikam kada mamadah pang wan aku manganai ‘bahurupan lapangan’ nitu, jadinya bula kutiup tarus ampah ka Salatan !!!” jar Pak Dukun kada marasa basalah. Tuhalus bulik asa lamah lintuhut. (Ifan, sahibul hikayat matan rawasari).

Editor: BPost Online
Ikuti kami di
KOMENTAR
TRIBUNnews.com Network © 2017
About Us
Help