BanjarmasinPost/

Si Palui: Iman Siup

Palui wayah hini pina sasain barajin sambahyang ka langgar di parak rumahnya. Asal inya wayah ada di rumah kada tulak ka mana-mana,

Si Palui: Iman Siup
BPost Cetak
Ilustrasi palui 

PALUI wayah hini pina sasain barajin sambahyang ka langgar di parak rumahnya. Asal inya wayah ada di rumah kada tulak ka mana-mana, inya bausaha ka langgar tarus umpat sambahyang fardhu nang lima waktu. Bahanu inya nang ‘bang’ atawa adzan, bagantian wan Tuhalus.

“ Umay.., samakin aktif haja kapala suku kita ni ka langgar wayah hini, “ ujar Garbus wan buhannya di gardu.

“Iya-am, Bus-ai.., mun aku kabatulan pas ada di rumah sampai waktu sambahyang, sadapatnya aku ka langgar. Sualnya babila lagi…,samantara diri sasain batuha . Iya kalu Tuhalus-lah ?!” sahut Palui.

“Nang jalas tu buhannya-ai, amun kita sambahyang bajamaah, kita kulihan pahala 27 kali lipat dibanding kalu kita sambahyang saurangan,“ jar Tuhalus manahapakan.

“Sabanarnya aku handak jua manuruti nangkaya kawan kita Palui wan Tuhalus ini, bilang hampir tiap waktu ka langgar bajamaah, Cuma rancak tu pas urang bang aku masih parahatan di pahumaan,“ ujar Tulamak baalasan.

“Nah.., kabiasaan itulah nang harus diubah, Mak-ai. Artinya kita harus bisa manyiasati waktu. Kalu parlu kita ka pahumaan atawa ka tampat gawian tu mambawa ‘jam wikir’nang kita kunci 5 atawa 10 manit satiap manjalang waktu sambahyang. Jadi kita kawa basiap-siap cagar tulak ka langgar atawa masigit”, ujar Tuhalus bapapadah.

“Aku akur banar wan kiat Tuhalus nitu”, ujar Palui, “Nitu ngarannya kita harus bisa-bisa maminij waktu. Artinya napa-napa tu mun dangan parsiapan, hasilnya insya Allah akan labih baik daripada nang mandadak situsaini, bahancap-hancap.” Al-ajallatu minasy-syaithon ! Gawian bahancap-hancap tu, parbuatan syaithon, Palui maungkai ilmunya sadikit dua dikit.

Subuh itu hujan marimis, tapi Palui wan Tuhalus tatap turun ka langgar. Kada saapa buhan Garbus, Tulamak, wan Tuhirang cangul jua ka langgar bapayung daun pisang. “ Alhamdulillah …”, ujar Palui wan Tuhalus sambil manyalami buhannya.

Tarnyata maskipun hari pina garimisan, subuh itu jamaah langgar lumayan banyak. Ada pang dua saf kurang sadikit. Mintu jua jamaah ibu-ibunya. Imam tatap Kai Pahaji Durasul sudah ada jua di langgar, Cuma sidin pina batukan.

Tuntung Palui Adzan, urang-urang badirian sambahyang sunat subuh. Imbah hitu mambaca :’ Ya Hayyu ya qayyuum’ babarapa saat sambil manunggu jamaah nang tadudi datang. Satalah itu Tuhalus badiri mangumandangkan qamat ( iqamah). Kai Haji Durasul badiri manyuruh Palui jadi imam. “Aku kada nyaman awak wan batukan,” jar sidin. Tapi Palui kada hakun, “Pian haja Pahaji-ai. Ulun tadi sudah ‘bang’,” ujar Palui ba-alasan. Tuhalus kada hakun jua disuruh jadi imam. “ Ulun sudah qamat tadi”, jar Tuhalus mahindar.

“Bah.. jar Pahaji Durasul.., Mun batutunjulan tarus, sawat libas subuh !” Akhirnya tapaksa jua sidin maju ka paimaman dikakawa-akan.

Pas waktu imam mambaca surah Al-Fatihah.., sampai bacaan : ‘Waladhdhoooll…..’ Prakk !! Pahaji Durasul takulai rabah.., sidin siup. Napa ada.., ma’mum salanggaran galu. Untungnya subuh nitu Mantri Hamid bajamaah jua di langgar. Imbah dipariksa ulih Mantri Hamid nadi di pagalangan Pahaji Durasul. “Kada papa sidin kauyuhan haja”, sambil dada wan puhun gulu Pahajai Durasul diulisi minyak angin, jua diciumakan ka hidung sidin.

Kada saapa mata Pahaji Durasul babuncalak. Tiba-tiba matan muntung sidin kaluar suara : “ …Liliiiinn !”.( Rupanya waktu sidin mambaca :’ Waladhdhoooll…’ tadi, suara sidin tacandak di tanggurukan lantaran sidin siup ). Imbah sidin sadar hanyar ‘Liiinn-nya’ tasambung pulang. Mandangar bacaan Kai Pahaji Durasul nitu, para jamaah pun badaraw ma-aminakan : ‘Aaamiiinn …!! (Ifan, sahibul hikayat matan rawasari).

Editor: BPost Online
Ikuti kami di
KOMENTAR
TRIBUNnews.com Network © 2017
About Us
Help