BanjarmasinPost/

Si Palui: KAHILANGAN SANDAL

Singkat kisah, karna sidin tulak matan rumah sungsung banar, sahingga sidin kada sampat sarapan.

Si Palui: KAHILANGAN SANDAL
Bpost/Riza
Ilustrasi Palui

MAMARINA Palui nang bangaran Pahaji Asmuni ( Ading ulih Paman Duraup) sidin bagana di Halabiu. Suatu hari sidin ada urusan balabuh ka Banjar. Sidin manyambang taksi Colt Amuntai-Banjarmasin di Muhara Tapus.

Karna sidin barancana handak bulik ari haja, maka sidin tulak matan rumah sawat banar sakitar pukul 06.00 kisukan. Maksud sidin bila salasai urusan, kikira tangah hari kawa bulik pulang ka Halabiu.

Singkat kisah, karna sidin tulak matan rumah sungsung banar, sahingga sidin kada sampat sarapan. Waktu taksi singgah di Binuang, sidin sawat taguring sahingga asa kulir umpat turun nginum atawa sarapan kaya urang-urang.

“Aku asa mangantuk banar, nah ! Biar kaina haja sakakali di Banjar,“ ujar Pahaji Asmuni bapandir awan panumpang tataian sidin di mutur.

Imbah sampai di tarminal pal 6, hari mamukul sapuluh. Parut Pahaji Asmuni asa padih, ancap sidin mancari warung nasi. Kada saapa sidin talihat sudah ‘mancungkung’ di warung Acil Irus. Istilahnya mancungkung, karna kabiasaan sidin amun di warung sidin kada baduduk di bangku, malainkan badungkung, yakni baangkat batis kadua balahnya.

Tuntung mahabisakan nasi bungkus wan pundut nasi sabuting, sidin mantagui riga. Lalu sidin malikit ruku sambil mahirup-hirup kupi, kamudian sidin mangaluarakan HP manalipun Palui kamanakan sidin, sakadar bahabar bahwa sidin ada di Banjar, tapi kada sawat singgah ka rumah Palui .

“ Jaka bamalam pang Pian Pakacil di rumah ulun,” jar Palui mambawai.

“ Mun aku bamalam, kasian Makacil ikam kaina puhun kamarian inya abut mamasukakan tarnak itik kami ka kandang ,“ alasan mamarina Palui.

Karna lawas kada tadapat wan mamarina, Palui ancap mandatangi ka tarminal Pal 6. Imbah tadapat di warung acil Isah, Palui umpat jua mamasan ‘tih-is’ ( teh es ), sambil manjumput pais waluh. Palui manawari mamarinanya apa handak makan nasi sup-kah, atawa rawon-kah ?

“ Kada..!.., tarima kasih, Lui-ai . Aku tadi hanyar imbah makan nasi bungkus wan pundut nasi,“ ujar nang mamarina.

Halaman
12
Editor: BPost Online
Ikuti kami di
KOMENTAR
TRIBUNnews.com Network © 2017
About Us
Help