Si Palui: AWAS KACA

“Sapartinya zaman nang dimaksud nitu, iya zaman kita wayah hini !” ujar Garbus manyala pandir.

Si Palui: AWAS KACA
Bpost/Riza
Ilustrasi Palui

BANGUNAN masigit wayah hini bagus-bagus, magah-magah. Cuma sayangnya nang maisi urangnya sadikit. Hibaknya tu kalu hari Jumahat, atau bila pas hari raya haja. Amun hari-hari wayah sambahyang fardhu, apalagi sambahyang subuh, jamaahnya amun ada jua sa-shaf, Alhamdulillah !

“Nitu buhannya-ai sasuai awan napa nanag sudah dikunsatatir ulih nabi kita, kaina ujar sidin akan datang suatu zaman, dimana urang maulah masigit bagus-bagus, tapi nang maisiinya sadikit,” Palui manyampaiakan papadahan tuan-tuan guru waktu di pangajian.

“Sapartinya zaman nang dimaksud nitu, iya zaman kita wayah hini !” ujar Garbus manyala pandir.

“Bulih jadi bujur napa jar ikam tu, Bus-ai “, ujar Tuhalus mandukung. “Sualnya kalu kita parhatiakan wayah hini bangunan masigit mimang banyak nang bagus-bagus, tapi isinya rancak puang. Mun kada parcaya cuba itihi wayah jamaah sambahyang subuh !”

“Iya-ai, Tuhalus-ai. Aku jadi kaingatan awan ‘kaum langgar’ di parak rumahku”, sahut Tuhirang manyurung pandir.

“Kanapa jadi ikam kaingatan awan kaum langgar nitu, Tuhirang ?”, takun buhannya.

“Saparti biasanya, kikira saparapat jam sabalum waktu sambahyang subuh, mik di langgar kami tu dihidupi ulih kaum, kamudian sidin maimbau warga muslim sagra datang ka langgar gasan sambahyang subuh bajamaah : ‘ Shubuh…. Shubuuuhh ! Ash-sholatu khairum minan naum ..! Yaa ayyuhal muslimuunn..Sholah ..sholaahh ! (suara kaum baulang-ulang bargama di pucuk langgar ). Tapi karna subuh nitu harinya pina ‘ marimis ‘, jadinya urang banyak nang pina kulir turun ka langgar”.

“Ikam pang ka langgar-lah ?!” salidik Garbus.

“Aku subuh hitu sudah bangun wan basiap-siap handak ka langgar. Cuma imbah malihat hari garibisan marimis, mancari payung kada tadapat ; jadinya aku bagana di palatar sambil manaduh-naduhakan ari satutumat. Dam hatiku urang baluman jua adzan”. (samantara itu kaum di langgar kudangar tatap haja bakiyauan : ‘ Yaa ayyuhal muslimuunash-sholaah ..! Ash-sholatu khairumminan naum ! (sambahyang itu labih baik daripada guring !). Karna sudah bapuluh manit bakiyauan jamaah pina kadada nang cangulnya ka langgar, Si Kaum rupanya asa pusang jua, kalu (?). Tiba-tiba sidin bakuriak di mik : ‘Awass..Apii..apiii …!’, jar kaum nitu bakakajutan.

Mandangar kuriakan Kaum tarsabut, apa ada urang kampung papada mambawa imbir kaluncatan kaluar rumah manuju ka langgar. Aku umpat jua bukah awan tapih-tapih. Imbah sampai di langgar, urang-urang batakunan awan kaum : Di mana apinya..?! Di mana apinya ..?!! ‘ Anu.. buhannya-ai, Mun kada sambanhyang, pacangan api naraka !!’, ujar kaum.

Imbah hitu sidin ancap basisiap ‘Bang’ (adzan). Kisukannya kaum langgar dikiyau ulih Katua RT, diingati dudi-dudi jangan lagi baucap nang kaya subuh tadi, karna maulah galu urang sakampungan !”.

Buhannya tadaraw tatawaan mandangar kisah Tuhirang nitu. Tulamak tatawa lucut sampai parutnya baguyang-guyang.

“Kalu kisah kaum masigit di kampungku lain lagi, buhannya-ai”, ujar Tulamak masih haja sambil tatawa. Nangkaya napa nang ujar Palui tadi bahwa masigit wayah hini bagus-bagus. Nah..,Masigit di kampungku nitu dindingnya bakaca kuliling. Nang badinding timbuk, cuma nang di bagian dapan hadap kiblat, sadangkan dinding lainnya sakulilingan kaca. Karna kacanya baning-barasih, maka rahat tarjadi para jamaah-tarutama nang tuha-tuha- tarampak dinding kaca nitu.

Panglihat sidin lawang, kalu ? Nah, supaya kajadian nangkaya itu kada taulang-ulang lagi, maka ulih pangurus masigit dinding-dinding kaca nitu ditulisi atau ditimpili awan tulisan kaligrafi ‘Asmaul Husna’. Cuma karna tulisannya diulah dangan ‘seni kaligrafi’ (nang pina bakiluk-kiluk), maka urang awam agak ngalih mambacanya. Apalagi urang nang mimang kada bisa mambaca tulisan Arab.

Suah suatu katika, ada kai-kai, sidin sambil manunjuk ka tulisan kaligrafi di dinding kaca tarsabut, batakun kaalah kaum masigit : ‘Napa wacaannya tulisan inih, kaum ?’. Mandapat tatakunan Kai nitu, Si Kaum tacangak satumat (rupanya si kaum bingung jua napa sabanarnya bacaannya ?!). Tapi kamudian kaum masigit nitu dangan mantap manjawab : Nitu wacaannya ‘AWAS KACA ! ‘, Kai-ai..!!?. Uuhh.. jar Kai ! Ha..ha…Ranai garutuk Kai ..! ( Ifan, sahibul hikayat matan rawasari).

Editor: BPost Online
Ikuti kami di
KOMENTAR

BERITA TERKINI

© 2018 TRIBUNnews.com Network,a subsidiary of KG Media.
All Right Reserved