Si Palui: Cucu Tulamak

Malihat banyak kakanakan usia sakulah di lingkungan RW Palui nang kada basakulah, katua RW barambuk awan warganya handak maulah

Si Palui: Cucu Tulamak
BPost Cetak
Ilustrasi palui 

Malihat banyak kakanakan usia sakulah di lingkungan RW Palui nang kada basakulah, katua RW barambuk awan warganya handak maulah cikal-bakal sakulahan tingkat PAUD/TK sarta tingkat SD di RW nitu.

“Bapa-bapak wan ibu-ibu sakalian nang saya hurmati, ujar Katua RW mambuka partamuan dangan warganya. “Assalamu’alaikum warahmatullahi wabarakatuh. Salamat Pagi, salamat batamuan kambali sarta salam sajahtra gasan kita sabarataan. Sabagaimana kita maklumi bahwa pandidikan itu sangat panting artinya, tarutama gasananak-anak kita nang marupakan ganarasi panarus bangsa. Mangingat wadah sakulahan nang cukup jauh matan lingkungan kita ini (ada pang sapuluh pal labih), sahingga banyak kakanakan kita nang kada sakulah. Samantara para urang tuhanya sibuk bagawian dan marasa riput kalu harus maantar-jamput anak-anaknya ka sakulahan nang jauh. Ulih karna itu kami bapapandiran dangan babarapa tukuh masyarakat, manggagas gasan diulahnya ‘cikal-bakal’ sakulahan, mulai tingkat Paud/TK sampai kainanya ka tingkat SD. Nah bapa-bapak wan ibu-ibu samunyaan, nitu haja sabagai pangantar dari ulun, muhun masukan atawa pandapat dari pian-pian barataan. Sakian, dan tarima kasih atas parhatiannya. Wassalamu’alaikum Wr.Wb.”

“Untuk pangadaan guru-gurunya kadimapa, Pa’ RW ?”, takun Garbus.

“Karna wacana ini hanyar sabatas ‘cikal-bakal’, maka untuk guru-gurunya kita cari di antara warga kita nang kira-kira cucuk gasan manjadi ‘guru samantara’ alias Gursam! Misalnya saparti bapa Palui dan bapa Tuhalus,” jalas pak RW.

“Masalah paralatan nang diparluakan, tarutama alat paraga gasan kakanakan Paud/TK, kaina kita panuhi sacara batahap. Ulun sudah bapandiran, Insya Allah bapak Tulamak siap haja mambantu kita maulahnya. Kalu sual hunur guru-gurunya, kita akan batuturuk. Syukur-syukur kalu kaina kita dapat bantuan/subsidi matan pamarintah,” jalas Pak RW.

“Kalu sual subsidi atawa bantuan pamarintah, nitu Insya Allah akan ada haja, asal kita kawa mambuktiakan tarlabih dahulu bahwa sakulahan kita tersebut. Bujur-bujur baik, diparluakan ulih masyarakat wan baparistasi,” jar Palui.

“Manganai yuran atawa bayaran bagi anak-anak nang sakulah atawa balajar di sakulahan nitu, bagaimana ?” takun Tulamak pulang. “Apakah garatisan alias kada babayaran, Pak RW ?”

“Manurut pandapatku, karna ini hanyar sakulahan rintisan, maka bayarannya untuk samantara sacara suka-rila haja dahulu. Kaina amun sudah kalihatan buktinya bagus wan maju, hanyar kita rambukakan kambali sual bayarannya itu,” ujar Pak RW.

Singkat kata dangan musyawarah-mufakat, akhirnya sakulahan parintis nitu jadi jua diulah. Untuk gadung sakulah gasan tingkat PAUD/TK samantara mainjam gudang di higa rumah Palui nang balum tapakai. Sadangkan gadung untuk tingkat SD, sudah ada izin dari lurah kainanya samantara akan manggunakan gadung aula kalurahan.

Bini Palui kabagian jua mambantu jadi ‘ibu guru’ di sakulahan Paud/TK di higa rumahnya.

Kabalujuran jua inya mimang katuju awan kakanakan.

Suah bini Palui malajari kakanakan Paud/TK ‘manganal warna’. Di atas mija guru diandaki putungan/racikan kartas warna-warni, kamudian murid tunggal ikungan disuruh maambil kartas di mija sasuai awan warna nang diminta ulih ibu guru Palui.

Pas sampai giliran cucunya Tulamak disuruh maambil putungan kartas nang bawarna ‘hijau’, kakanak nitu panuh parcaya diri maju mamaraki mija tampat kartas warna-warni. Imbah hitu balalu kartas-kartas nitu diambilnya ‘saraupan’, lalu dijulungnya awan ibu guru. “Nah.. bu guru, pian pilih saurang ..!” jarnya. Masalahnya cucu Tulamak nitu mimang balum mangarti sual warna.

Guru-guru lainnya wan bu-ibu urang tua murid nang malihat kajadian nitu, tadaraw tatawaan sambil kalambisikan. “Dasar Cucu Tulamak inih, pa-akalan banar nangkaya kai-nya jua.” (Ifan, sahibul hikayat matan rawasari)

Tags
Si Palui
Editor: BPost Online
Ikuti kami di
KOMENTAR

berita POPULER

TRIBUNnews.com Network © 2018
About Us
Help