BanjarmasinPost/

Si Palui: Limpak di Kapala

Bahari tu murid-murid sakulah ‘SR’ masih manggunakan ‘lay’ (samacam limpingan nangkaya ‘asbis samin’ bawarna hirang

Si Palui: Limpak di Kapala
Bpost/Riza
Ilustrasi Palui 

PALUI tu bahari waktu di ‘Sakulah Rakyat’ (SR), kalu wayah hini ngarannya ‘sakulah dasar’ (SD), inya tamasuk murid nang rajin wan cardas (candatan). Guru-gurunya barataan sayang awan inya, karna disamping rajin dan pintar nitu kalakuan Palui jua supan-santun, baik tarhadap kakawanannya, tarlabih-labih lagi wan guru-gurunya.

Bahari tu murid-murid sakulah ‘SR’ masih manggunakan ‘lay’ (samacam limpingan nangkaya ‘asbis samin’ bawarna hirang muka-balakang, dibari bingkai, ukurannya kurang labih sabasar kartas kawartu). Fungsi lay sabagai pangganti buku tulis sagan latihan sahari-hari, manulisnya pakai alat tulis nang disabut ‘garip’ atawa ‘grip’ nang hujungnya diasah/ditajami nangkaya pinsil. Hasil tulisannya bawarna putih (jadi cukup jalas, karna dasarnya hirang, tulisannya putih). Kalu tarjadi kasalahan manulis di lay nitu, mahapusnya cukup disapu awan jari tangan atawa pakai kain parca.

Kalu guru handak mambari nilai (ponten) hasil pakarjaan murid nang ditulis pada lay, sidin manuliskannya pakai ‘kapur tulis’ (nang biasa dipakai di papan tulis).

Takisah murid-murid bila palajaran barhitungnya/maupun palajaran lainnya mandapat ponten nilainya : 8, 9, apalagi 10; buhannya balalu malakukan samacam ‘salibrasi’ (gaya urang kahimungan), dangan cara manimpilakan ponten angka 8, 9, atawa angka 10 sabagai ‘cap kapur tulis’ di pipi marika. Nitu manjadi kabanggaan buhannya tarhadap murid. Palui pararancaknya nang malakukan salibrasi karna inya mimang pintar.

Bahanu ada murid lain nang jahil atawa nang bahiri, lalu inya mahapus cap ponten kapur tulis di pipi kawannya nang basalibrasi nitu, kajadian nitu bisa maulah hual ganal. Palui suah jua tahual awan kawannya gara-gara sual nitu.

Malihat kajadian tahualnya Palui, --satalah mandalami akar parmasalahannya- akhirnya para guru sapakat malarang salibrasi manimpil ponten di pipi. Jadinya murid-murid maubah salibrasinya manuruti nangkaya urang di ‘ring tinju’, yaitu maangkat tinggi-tinggi lay-nya (ma-arayakan pintan harat : 8, 9, apalagi 10) sambil bakuliling kelas pada jam-jam istirahat, atawa wayah bulikan sakulah.

Suah suatu katika guru klasnya Palui garing kada masuk mangajar. Ulih kapala sakulah ditunjuk guru agama hunur nang manggantikan samantara hari itu.

“Anak-anakku sakalian. Pak guru kelas kalian (Sarmidi), hari ini kada masuk lantaran kasihatannya taganggu,” ujar guru pangganti nitu.

“ Sasuai jadwal, mata palajaran kita sakarang ‘ilmu tumbuh-tumbuhan. Nah.., sabalum kita mambahas ulang palajaran nang tadahulu, sabagai salingan, pak guru handak mangatahui sampai dimana pangatahuan umum wan katalitian kalian tarkait sual tumbuhtumbuhan!” ujar guru pangganti nitu.

Ujar sidin, cuba kalian parhatikan bujur-bujur bahwa di awak kita sabagian besar ditumbuhi ulih bulu-bulu. Ada bulu-bulu nang jalas kalihatan saparti rambut di kapala, sisingut atawa janggut di dagu, bulu batis, bulu dada, sarta bulu kitik di katiak). Tapi sabatulnya ada juga bulu-bulu halus nang tumbuh di awak kita, saparti di talinga kita ada bulu-bulu halus.

Halaman
12
Editor: BPost Online
Ikuti kami di
KOMENTAR
TRIBUNnews.com Network © 2018
About Us
Help