BanjarmasinPost/

Si Palui: Ada Batasnya

“Ngaran urang hidup di alam demokrasi , jadi pang bahanu tasinggol ai, jabatan pulitik nitu? Bilang kada ham aku naya

Si Palui: Ada Batasnya
Bpost/Riza
Ilustrasi Palui 

ADA batasnya julaklah nang ngaran jabatan jadi kapala daerah nitu, paling lawas lima tahun atau sapuluh tahun ampih am sudah. Jadi jangan dikejar-kejar, bila sampai garis tangan ya jadilah ia! Ada jabatan nang kadada batasnya julak ai, yaitu jadi rakyat, nitu sampai ka mati am, kalau wakil rakyat pamilihan pulang, imbah tuntung lima tahun, balum tentu tapilih pulang. ”Napa-napa ikam Lui bapander jabatan kalu ah, ditangkap aparat, ikam tu sudah bapander ka ranah pulitik. Mamander masalah nitu apa tabu banar, apalagi ikam guru honor handak kalu kena diangkat jadi guru aparatur sipil negara (ASN)?” sindir Garbus.

“Ngaran urang hidup di alam demokrasi , jadi pang bahanu tasinggol ai, jabatan pulitik nitu? Bilang kada ham aku naya. Palui katuju jua wan masalah pulitik, padahal sudah dipadahi haja ulih kapala sakulah (kepsek) jangan umpatan bapulitik, apalagi saat ni suhu pulitik di kuta dudul sudah tinggi, kalau kada hati-hati, iya kalu ditangkap panwas atau aparat nang lain. Aku mamadahi haja pang Lui lah, ikam kan guru honor, sudah manarima SK guru honor, sayangi profesi ikam nitu, jangan bila duduk di warung hingga bapander usung-mausung,” nasihat Tulamak ka Palui.

“Bujur Mak ai, masalah usung-mausung, tapi kumaksud nitu mausung urang mati, kada disangka habis saruan di pangantin , malamnya sidin rabah, mangaruh,. Ujar tarkena serangan panyakit darah tinggi, akhirnya maninggal dunia, jadi umur ada batasnya, kontrak hidup ada waktunya, jabatan jua ada batasnya. Sudah maninggal dunia balajur ai, diusung urang ka tempat perisitirahatan terakhir, kain kafan haja lagi nang dibawa ka kubur. Mutur nang harat, bini nang langkar, duit nang banyak, anak nang pintar, kadada nang hakun umpat babuat ka liang lahat, biar sahidup samati bajanji!” Palui lantih banar.

“Jadi ada batasnya berataan, kebebasan gin ada batasnya supaya jangan bebas banar, kena kabablasan!” Garbus manambahkan.

“Kalau tahu ada batasnya nitu, sasadangnya ai, manjajak gas ibarat manyupir mutur, ada wayahnya talaju sadikit, ada wayahnya nang bagamat haja karana jalan sampit urangnya banyak, iya kada,” Tulamak umpat jua manambahi.

“Han rami kalu bila kita naya takumpulan, saling maingatakan, masalah hidup wan kahidupan, supaya bajajak di atas rel nang sasuai aturan negara maupun aturan agama,” Palui mantap panderan.

“Bujur Lui,” taimbai Tulamak wan Garbus manyambat.

“Nang panting kita sabagai rakyat ya, jangan kada tahu jua pang wan pulitik, harus tahu jua, siapa calun kapala daerah kita naya. Kemudian apa bubuhan ikam sudah tadaftar sabagai pamilih pada pilkada 27 Juni 2018 kena?” takun Palui wan buhannya.

“Ikam kaya apa Lui, tahu kalu sudah wan calun kapala daerahnya? Wan jua tadaftar sabagai pamilih pada pilkada kena?” takun Garbus.

“Alhamdulillah aku tahu sudah calun kapala daerahnya, wan jua sudah tadaftar aku sarumahan, sudah batempel di lawang rumahku,tanda tadaftar sabagai pamilih iya am sudah, asa nyaman aku bahinak,” ujar Palui.

“Nang panting kita aman, lancar wan sukses pilkada kita di banua naya,” sahut Tulamak. (aan maulana/penulis matan kuta dudul,HSS)

Editor: BPost Online
Ikuti kami di
KOMENTAR
TRIBUNnews.com Network © 2018
About Us
Help