BanjarmasinPost/

Si Palui: Jangan Lalai Lui!

“Tampulu Bus ai, aku sadikit ada baisian ilmu, jadi pang kuungkai wan ikam,” sahut Palui.

Si Palui: Jangan Lalai Lui!
Bpost/Riza
Ilustrasi Palui 

BULAN tadi atau bulan partama tahun 2018 banyak nang anum masih balum pangsiun lagi umurnya jika diibaratakan PNS, sudah baputus dunia alias maninggal dunia. Ulih karananya kada jemu-jemunya maingatakan kapada saluruh warga masyarakat agar jangan lalai lagi tarhadap umur , sebab sewaktu-waktu bila kita dalam keadaan sanang atau pun susah malakal maut mancabut nyawa kita. I ya am sudah, habis ampih bahinak di dunia naya.

”Salama nafas di kandung badan, dibuka pintu taubat saluas-luasnya, tapi ingat bila nafas sudah di tenggorokan pintu taubat ditutup sudah, kala nitu manusia diperlihatakan bakal ka surga atau ka naraka?” Palui bapapadah banar.

“Napa Lui kaya urang betausiah haja ikam?” rawa Garbus.

“Tampulu Bus ai, aku sadikit ada baisian ilmu, jadi pang kuungkai wan ikam,” sahut Palui.

“Sabaiknya ilmu nitu gasan saurang haja, apalagi manyangkut amalan, parlu dirahasiakan Lui ai, kena disambat urang ria istilah dalam basa Arabnya, atau jar urang baagak,” Tulamak manyahut sakalinya.

“Maksudku sasama kita batalu haja kuungkai, kada usah kalu aku ceramah di masjid, cukup kita batalu haja saling maingatakan iya kada Bus?” Palui kada handak kalah.

“Bujur saratus persen Mak ai, Palui maingatakan haja wan kita naya. Cuba itihi ha salama bulan tadi di kuta dudul wan sakitarnya kada kahitungan lagi banyak nang anum artinya balum pangsiun lagi, sudah baputus dunia, ada nang kena serangan jantung, ada nang garing lawas, ada nang mati kecelakaan. Kita makalahan am masih banafas, kada dijadikan palajarankah?” Garbus umpat jua malawanakan Palui.

“Aku manyampaiakan pasan tuan guru haja nang sidin rajin tausiah di masjid Nurut Takwa. Ujar sidin, handaklah satiap tarikan nafas kita jangan sampai lupa wan Allah Taala. Jadi bila kawa kaya nitu, pabila haja, dimana haja, bila malakal maut handak mancabut nyawa kita siap banar, mudahan kita dicabutnya dalam perasaan tenang, nyaman, kada gundah-gulana wan nang panting husnul khatimah buhannya ai! Ingatakan ha jarku ni, hidup kada lawas, cagar matian kita naya!” Palui tarus bapapadah wan kakawalannya.

“Tarimaksih Lui ai, Bus ai, baisi kawan salalu maingatakan, kamana lagi kita baingkut kalau kada kapada Allah Taala. Baingkut ka manusia, inya gin kakurangan jua, maski sugih, gagah, cagar kalah jua kena wan malakal maut nang bangaran Izrail nitu iya kada?” Tulamak mamburinjing bulu awak.

“Ikam jangan lalai Lui ai! Kena haur mamadahi urang haja, saurang makalahan am asik-masyuk bausaha urang salat bajamaah ka masjid!” sindir Garbus.

“Tarimaksih nah Bus ai, aku dipadahi jua,” Palui lihum. (aan maulana/penulis matan kuta dudul,HSS)

Editor: BPost Online
Ikuti kami di
KOMENTAR
TRIBUNnews.com Network © 2018
About Us
Help