Anak Buta

“Napa Lui maka buta, bakas napa matanya, kana sumpit hantukah?” takun Garbus sarius.

Anak Buta
Bpost/Riza
Ilustrasi Palui

ANAK nang kita haragu di rumah, pabila pandidikan urang tuha baik maka baik jua anak, bila urang tuhanya kadada mandidik, misalnya pandidikan agama, maka jangan hiran anak kada bisa salat jua inya baik di rumah maupun di tempat lainnya.

“Alhamdulillah Bus ai anakku tatap sakulah, maski inya buta,’ ujar Palui ka Garbus, asa takajut Garbus dihabari Palui kaya nitu.

“Napa Lui maka buta, bakas napa matanya, kana sumpit hantukah?” takun Garbus sarius.

“Jadi ikam antar tiap harikah ka sakulahan anak ikam ya Lui?” takun jua Tulamak.

“Kada hakun diantar Mak ai, bisa haja inya basapida saurang ka sakulahan,” sahut Palui himung.

“Buta jar ikam tadi, maka bisa basapida kaya apa ni?” Garbus tauling kapala, malihat cara barpikir Palui.

“Kakaknakan wayahni kada hakun diantar lagi ka sakulahan, kada kaya kita bahari katuju minta antar wan kuitan bila handak ka sakulahan,” jalas Palui.

“Hebatlah anak ikam, maski buta tatap inya kawa kaya urang normal jua, mungkin parasaan anak ikam kuat banar, ni jalan balubang lakas inya baliung , iya kah?” Tulamak manangguh.

“Ni nah aku mamacahakan kanapa anakku kusambat buta ya? Karana inya kada handak kaya urang, ka sakulahan tatap basapida tinjak, maski kakawalannya banyak sudah nang basapida mutur ka sakulahan, baisian hapi kada hakun ditukarakan, maski kakanakan lain kuting-kuting wan hapi, inya kada handak ditukarakan hapi, makanya anakku nitu kusambat anak buta, karana inya saakan-akan kada malihat apa nang dimiliki kakawalannya,” Palui mamacahakan napa anaknya jadi inya sambat anak buta.

“Bagus Lui ai, kaya ikam bahari jua saku, kada biasa batagih-tagih ka kuitan ikam maski kuitan mampu haja manukarakan. Wayahni nah , manurun ka anak ikam saurang, nyaman banar dilihat anak kaya nitu bakti wan urang tuhanya, iya kada?” Garbus mamuji ka Palui.

“Alhamdulillah Bus ai, Mak ai, anak ni adalah amanah , bila nyaman bagai permata hati, tapi bila manyakitkan maka bagai mananak nasi, mambalaman apinya di dalam hati, bisa stroke urang tuha!” Palui rami bakisah anaknya nang bakti ka urang tuha. Manggut-manggut Garbus wan Tulamak.

‘Han jarku, kunci supaya anak bakti ka urang tuhanya , ada pada diri kita jua ai, bila kita bakti wan urang tuha , kena insya Allah anak kita bakti jua wan kita, tabukti nitu sudah. Bila kita durhaka maka anak kita akan durhaka jua ka kita kenanya. Mudahan bakti berataan anak-anak kita nitu?” Palui gagarunum.

“Hukum karmakah Lui?” takun Garbus.

“Karma atau kada aku kada tahu jua pang? Tapi nang jalas, kabaikan akan dibalas Tuhan jua wan kabaikan, bila kita barbuat jahat maka akan menerima balasannya jua nang setimpal,” Palui banyak wawasan wayahni.(aan maulana/penulis matan kuta dudul,HSS)

Editor: BPost Online
Ikuti kami di
KOMENTAR
TRIBUNnews.com Network © 2018
About Us
Help