Si Palui: Tuhuk Sehat

DUNIA wadahnya bala, musibah, bancana, ka­da urang lain lagi nang mambuktiakan, tapi Pa­lui saurang dapat musibah.

Si Palui: Tuhuk Sehat
BPost Cetak
Ilustrasi palui 

DUNIA wadahnya bala, musibah, bancana, ka­da urang lain lagi nang mambuktiakan, tapi Pa­lui saurang dapat musibah. Kanapa te jadi datang musibah?

”Aku tarabah basapida mutur umanya ai, tagalincir di jambatan ulin handak manuju ka sakulahan, bulik kada jadi turun,” Palui mangatuk lawang rumah lakas nang bini mambukai lawang nitu, sambil baucap sabar.

“Ayuha kada kawa abahnya lah, ngaran musibah handak datang menjemput, untung ja pian kada mati,” sahut nang bini prihatin.

“Mun aku mati pang apa ikam?” sahut Palui maringis.

“Kena haja dahulu mati, ni nah kita cagar baisi kapala daerah nang hanyar tahun 2018 ini jua abahnya ai,” nang bini bisa mahibur.

“Aku kada tahu jua sual pamilihan kapala daerah nitu, nang jalas aku sakit banar hati kada kawa turun ka sakulahan, dalam hati guru-guru wan kapala sakulah apakah? Kamanakah jar aku bajalanan kada karuan, takutannya kaya nitu,” sahut Palui masih takuringis karana sakit banar punggung, gulu wan batisnya, tahampas ka rabahan sapida mutur.

Palui merenung sambil nang bini mancari banyu es gasan mangumpres jari batisnya nang bangkak nitu.

”Han satumatnya handak kana. musibah, biarpun hati-hati banar basapida mutur tatap musibah nitu datang, wan jadi palajaran bahwa kita kada bulih sumbung sadikit jua pun kapada Allah Taala,” batin Palui.

“Napa abahnya taungut wan takuringisan?” takun bininya.

“Kadada apa-apa pang umanya ai,sampai sudah musibah mahampiri awakku, biar mambaca Yasin, babacaan shalawat atau lainnya tatap musibah nitu mahampiri, karana janji diriku jua sabalum lahir ka dunia ya?” Palui sabar mahadapi musibah.

“Tuhuk-tuhuk sehat ya garing abahnya ai, tuhuk-tuhuk hidup ya mati habis am kisah?” ujar bininya.

“Mun sehat tarus baumuran kasihan duktur kada payu, kadada lagi urang baubat ka rumah sakit atau ka puskesmas, manganggur duktur,” Palui bakilah

“Jadi parlu diambil palajaran musibah nang mahinggapi kita hadapi dangan sabar, bila nikmat ada jangan lupa barsyukur,” bininya nang bapapadah.

“Han jarku barakat bini rajin ka masjid tiap hari Sabtu kamarian mandangarakan tausiah tuan guru Kapuh Padang ada jua tatarang upihnya,” Palui asa tahibur mandangar papadah bininya.

“basabar, basabar kalau kana musibah, tapi basyukur ya basyukur kalau mandapat nikmat,” bini Palui manirukan ucapan tuan guru. (aan maulana/penulis matan kuta dudul, HSS)

Editor: BPost Online
Ikuti kami di
KOMENTAR
TRIBUNnews.com Network © 2018
About Us
Help