Si Palui: Handak Tarus

“Manusia nitu apalagi sudah baisi bini wan akan pasti handak tarus,” ujar Palui ka Garbus.

Si Palui: Handak Tarus
Bpost/Riza
Ilustrasi Palui

SIAPA haja nang mangaku umat Rasulullah SAW maka tarbatas umurnya, puritan 60 sampai 70 tahun pas maninggal dunia. Kalaupun labih dari nitu artinya dapat bunus sidinnya. Tapi kabanyakan nang wayahni, ada nang kurang 60 tahun sudah badahulu berpulang ka rahmataullah. Maklum banyak urang baucap umur kada babau, ibarat buah nyiur ada nang masih katilambung sudah gugur, ada nang sudah tuha banar hanyar gugur nyiurnya.

“Manusia nitu apalagi sudah baisi bini wan akan pasti handak tarus,” ujar Palui ka Garbus.

“Napakah ikam ni Lui? Nyata ai handak tarus maklum saikungannya baisi bini, nang bini kada mangarti bahwa nang laki handak tarus minta layani, nitukah Lui?” Garbus kada mangarti.

“Ada bujurnya jua jar ikam nitu Bus ai,” sahut Palui lihum.

“Maklum urang dua laki bini, tarkadang nang laki nitu kada tahu dibasa, kada tahu bini uyuh atau haid ngaran hadak tarus ya, tapaksa nang bini malayani dangan muha takurasam,” sahut Tulamak.

“Iya haja sudah kalau kaya nitu,’ sahut Palui lagi.

Karana Palui ni katuju bagaya atau jar urang nitu baruya wan kakawalannya, sampai wan katua RT gin digayai Palui jua.

”Uh katua RT kalau urang dua laki bini nitu handak tarus, utamanya nang laki iyakah?” surung Palui ka katua RT.

“Iya garang Lui? Kalau aku sudah tuha ni saminggu sakali haja, kada kawa tiap malam ya, atau kaya urang nang anum babini hakun tujuh kali sahari samalam?” ujar pak RT sambil tatawa.

“Maksud ulun katua RT lah, urang nang sudah baumur 60 tahun handak tarus napa nah?” Palui maulah partanyaan.

“Iya jar ikam tadi, maklum sidin masih ada bini handak tarus nang kaya nitu pang, paham haja kalu ikam nang babini jua?” tebak katua RT.

‘Ayuha ada bujurnya jua jawaban pian nitu, tapi lain maksud ulun di sini, adalah handak tarus hidup, makanya urang nang sudah tuha nitu sadikit gin garing lakas baubat, karana sidin handak tarus hidup iyakah?” Palui mamacahakan parsualannya.

“Bujur banar jar ikam nitu Lui ai? Kaya aku nah sudah tuha, 64 umur sudah, sadikit haja gin garing misalnya kana flu lakas aku baubat karana handak tarus hidup, indah mati jua sakalinya,” ujar pak RT manyambat diri sidin sorang.

“Han jar ulun te, iya kalu handak tarus hidup sakalinya, makanya ada puisi nang syairnya barbunyi ingin hidup saribu tahun lagi,” ujar Palui mahibur katua RT.

“Kada ham Lui ai, makanya aku wan bini kada mau lapas atau tatinggal bila bajalan kamana-mana kartu BPJS kesehatan, jadi dimana kana flu atau garing lainnya lakas aku ka puskesmas terdekat baubat, pariksa kesehatan, nyaman kalu, supaya jangan mangalihakan anak buah atau urang lain, takutan jua aku garing nang kada iskaya, di kalambu haja tarbaring kena digarunumi bini wan anak,” katua RT rami bakisah lihum Palui. (aan maulana/penulis matan kuta dudul,HSS)

Editor: BPost Online
Ikuti kami di
KOMENTAR

BERITA TERKINI

© 2018 TRIBUNnews.com Network,a subsidiary of KG Media.
All Right Reserved