Si Palui

BAMI’RATAN

Sabagaimana nang sudah-sudah, Palui salalu diparcaya sabagai Katua Panitia panyalanggara, dibantu ulih Garbus, Tulamak, Tuhalus

BAMI’RATAN
dokumen
Si Palui 

WAYAH takumpulan di gardu ‘James Bond’ RT 007/RW 045, buhan Palui sapakawanan talihat pina kuap-kuap kaya urang kurang guring. Sualnya malam tadi buhannya manyalanggarakan paringatan Isra’ dan Mi’raj Nabi kita SAW, nang satiap bulan Rajab diadaakan di langgar di lingkungan RW-nya.

Sabagaimana nang sudah-sudah, Palui salalu diparcaya sabagai Katua Panitia panyalanggara, dibantu ulih Garbus, Tulamak, Tuhalus wan Tuhirang sabagai siksi Umum, yakni bagian nang maulah dikurasi, tukang atur kunsumsi, jua nang mambagi undangan gasan jamaah langgar di sakitarnya, tamasuk jua nang mahubungi kalumpuk pambaca Maulid Habsyi’-nya. Kalu nang mahubungi tuan guru pancaramahnya wan qari nang mangaji, Palui saurang nang mahubungi.

Acara malam itu tuntung sakitar pukul sablasan. Tapi sabagai angguta panitia, buhannya tapaksa bulikan mamukul dua-blas karna harus basisimpun, mambarasihi langgar, manuntungakan urang babasuh piring dan lain sabagainya. Makanya waktu takumpulan di gardu malihat buhannya pina kuap-kuapan, Palui baucap, “Insya Allah buhannya-ai ada haja tu bunus pahalanya dari Allah, dibanding wan urang-urang nang datang sakadar sabagai tamu-undangan haja.”

“Mun dibanding urang bami’ratan bahari, kita wayah hini baluman apa-apa. Manurut kisah abahku, bahari tu mun bami’ratan bilang balantak sampai kasubuh.” jar Palui mahimungi buhannya.

“Umai, Lui. Kada mangantukan-kah urang, Lui ?” bahas Tuhirang.

“Yah.., sapalih ada jua pang kalu nang mandangarakan caramah tuan guru sambil pina tapajam-tabuncalak mangantuk, tarutama nang di salasar sambil basandar di tawing halat. Apalagi buhan kakanakannya, sawat haja taliur-liur taguring. Kaina imbah mandangar bunyi karincingan piring urang basusurung, hanyar buhannya bangunan,” jar Palui pulang.

“Jaka bulan puasa, nitu kawa salajur makan sahur, Lui-lah?” ujar Tuhalus sambil tatawa.

“Inya kadimapa maka acaranya tu sampai balantak kasubuh. Lui ?” takun Tulamak sarius.

“Inya kaya ini, Mak-ai. Bahari tu ujar abahku, Tuan Guru pancaraamahnya mangisahakan paristiwa Isra’-Mi’raj nitu bujur-bujur sacara runtut, kada balingkau-lingkau nangkaya urang wayah hini. Dimulai kaadaan matan sabalum Nabi kta dibarangkatkan ulih Allah Ta’ala, lalu kisah parjalanan Isra’ matan Makkah ka Masjidil Aqsa awan kandaraan Buraq. Imbah hitu kisah Nabi kita di-Mi’raj-kan naik ka atas langit manuju ‘Sidratul Muntaha’. Kaya apa kisahnya Nabi kita batamuan awan para nabi tardahulu yakni Nabi Adam, Yahya, Yusuf,, Idris, Harun Musa, sarta Nabi Ibrahim ‘alaihimassalaam. Dikisahakan jua katika Nabi kita sampai di Baitul Ma’mur dan baaudinsi awan Allah SWT di Sidratul Muntaha. Sampai akhirnya Nabi kita turun dari langit hingga kambali lagi malam itu jua ka Makkah Almukarramah,” jalas Palui wan buhannya panjang libar.

“Uu..mun kaya itu kisahnya, cucuk-ai acaranya balantak sampai taka subuh,” ujar Tulamak unggut unggut.

Halaman
12
Editor: Didik Trio
Ikuti kami di
KOMENTAR

BERITA TERKINI

berita POPULER

© 2018 TRIBUNnews.com Network,a subsidiary of KG Media.
All Right Reserved