Si Palui

Si Palui: Minta Jatah

”Umai nyaman banar itik panggang, warung makan hanyar buka di kuta dudul kita ni umanya ai,” ujar Palui

Si Palui: Minta Jatah
Bpost/Riza
Ilustrasi Palui 

DALAM hidup berumahtangga, Palui ni karana marasa kapala kaluarga jadi pang handak menang tarus wan bini di rumah. Bila datang bajalanan bisa bapander haja ka bini mambawa habar nang nyaman-nyaman tapi kada biasa mambawa bini bajalanan.

”Umai nyaman banar itik panggang, warung makan hanyar buka di kuta dudul kita ni umanya ai,” ujar Palui ka bini mambawa habar sambil basisiut kapadasan.

“Uh ha lah, ulun ulih-ulihnya mana?” takun nang bini ketus.

“Aku pas-pasan jua basangu duit umanya ai, kena ai baasa ka situ pulang aku makan,” sahut nang laki.

“Kanyang habar haja nah, dahulu bakisah durian Bi’ih kadada jua mambawa akan ka rumah?” sindir nang bini.

“Sabar haja umanya ai, ada ja kena wayahnya aku bawakan,” sahut Palui.

Karana marasa dikalahakan tarus ulih nang laki maka ada kahandak matan nang bini awas haja kena abahnya naya bila minta jatah.”Awas ja abahnya ai, bila pian kena minta jatah maka tahu tu rasa!” sangit bini Palui dalam hati.

Barabahan Palui dua laki bini karana malam ni malam Sanayan tarmasuk malam nang afdhal bagi urang-urang dua laki bini. Akhirnya Palui mambawai guringan ka bini. Pander ka hulu ka hilir, ka laut ka darat, akhirnya napa nah? Iya haja kawa ditangguh sudah sifat Palui naya.”Uh umanya aku minta jatah nah malam ni, apalagi sudah minum jamu, hintalu itik wan madu,” rayu Palui .

“Han jar ulun pas kalu tangguhan ulun,” sambat nang bini.

“Imbah apalagi nang diulah tampulu aku masih hidup umanya ai?” kilah Palui.

“Hadangi ja abahnya lah, ulun handak ka kamar mandi,” ucap nang bini lakas babangun pada paguringan nitu.
Dikira Palui ya bakamihkah bininya. Sakalinya apa..”Nah abahnya, cium ha itik panggang wan durian numur satu ya!” sangit bini Palui manciumakan ka muha laki cd (calana dalam), handak minta jatah tarus pian ni, mambari ulun itik panggang wan durian kada biasa!” dasar bamamai nang bini.

Palui takajut diciumakan bini cd nitu. Garigitan banar aku nah, jaka kada bini kutampar ikam umanya Amat ai. Palui sangit jua sakalinya.

Gaduh di rumah urang dua laki bini bekalahi.

“Makanya abahnya ai, sasadangnya haja engkin nitu sifat, habis ka bini luar biasa engkinnya, renungkan ha pian!” nang bini gagarunum.

Taungut Paluinya kuler inya belawanan, baik bakalah haja Lui ai? Bini lagi panas hatinya.(aan maulana/penulis matan kuta dudul, HSS)

Editor: Didik Trio
Ikuti kami di
KOMENTAR

BERITA TERKINI

© 2018 TRIBUNnews.com Network,a subsidiary of KG Media.
All Right Reserved