Si Palui

Si Palui: Badahulu ka Surga

Tapi untung ada baisi bini nang paham wan mangarti keadaan laki, sahingga kadada keluh kesah manghadapi kanyataan hidup sarba kekurangan.

Si Palui: Badahulu ka Surga
Bpost/Riza
Ilustrasi Palui 

BERATAAN manusia hidup pasti handak sugih, nyaman di dunia wan salamat di akhirat. iya kada Lui? “Tapi aku nah hidup pas-pasan haja, dicari sahari gasan sahari jua dimakan, ya beginilah nasib si miskin barkawan dangan darita!” hati Palui gagarunum.

Tapi untung ada baisi bini nang paham wan mangarti keadaan laki, sahingga kadada keluh kesah manghadapi kanyataan hidup sarba kekurangan.

”Alhamdulillah aku baisi bini kaya ikam umanya Amat ai, bisa basikap manarima kanyataan, jakanya kada, bisa maninggalakan ka laki?” singgung Palui.

“Ayuja abahnya ai, ulun sandang haja hidup kita dalam sarba kekurangan, asal kaya hati kita bardua iya haja sudah. Hidup kada lawas paling umur 60 atau sampai 70 tahun, habis sudah jatah bahinak! Jakanya kita tahu wan umur kita masing-masing, pasti ha paling-paling kapala anam nitu, siap-siap ja kita dipanggilNya,” ujar nang bini sabar.

Waktu bulan Rajab tadi Palui mandangar tausiah tuan guru masalah parjalanan Nabi Muhammad SAW nang malihat di surga panghuninya banyak urang miskin.

”Nabi malihat panduduk surga nitu kabanyakan dari kaum fakir miskin, jadi jangan khawatir dangsanak-dangsanakku nang hidupnya kurang mampu, apabila buhan pian ikhlas manarima kanyataan hidup ni inshaa Allah akan jadi panghuni surga di akhirat kelak,” ungkai tuan guru ingat banar Palui masih.

“Uh damintukah tuan guru?’ sahut Tulamak.

“Ya kaya nitulah Tulamak ai kenanya, asal ikhlas manarima kanyataan hidup, jangan gagarunum, di luar ikhlas tapi di hati sangkal hidup sarba kekurangan, jangan kaya nitulah!” papadah tuan guru.

“Kalau kawa gurulah, manjadi urang miskin nang barmartabat,” sahut Garbus.

“Uh damintukah Bus?” Palui manyahut jua.

“Biar jadi urang nang kurang mampu, tapi kita punya harga diri, maka bila masuk ka surga badahulu 500 tahun pada urang nang sugih-sugih nitu, cuntuh nyata adalah rajia pulisi patuh intan, kadada nang dibawa-bawa, pasti ha nang diperiksanya SIM wan STNK haja. Tapi kalau rajia banyak banar bawaan solar, bensin sampai saribu litar, pasti ha banyak tatakunan pulisi, jadi tarlambat datang ka tempat tujuan karana banyak pamariksaan. Kaya nitu jua kalau baisi harta banyak, tentunya banyak banar jua partanyaan malaikat, dimana mandapatkan harta, gasan apa digunakan harta nitu wan lain-lainnya. Kalau urang kada mampu kada banyak partanyaan malaikat, jadi lakas haja badahulu masuk ka surga, dibanding urang sugih nitu tadi buhannya ai?”tuan guru sambil manciling sidin manjalasakan.

“Asa sigar aku nah, maski tamasuk urang kada mampu alias miskin jangan kacil hati, di akhirat kena mandapat kadudukan tarhurmat di mata Allah SWT, masuk surga badahulu pada urang sugih,minta maaf buhan bos lah,aku badahulu ka surga. Tapi pang sabar, ikhlas hidup susah syaratnya? Mudahan aku tamasuk urang nang demikian keadaannya,” Palui lihum sorangan. (aan maulana/penulis matan kuta dudul, HSS)

Editor: Didik Trio
Ikuti kami di
KOMENTAR

BERITA TERKINI

TRIBUNnews.com Network © 2018
About Us
Help