Si Palui

Si Palui: Buta Tuli

BANYAK haja manusia wayahni nang tarsasat jalan, padahal hawas banar panglihatannya wan jarnih banar jua pandangarannya.

Si Palui: Buta Tuli
Bpost/Riza
Ilustrasi Palui

BANYAK haja manusia wayahni nang tarsasat jalan, padahal hawas banar panglihatannya wan jarnih banar jua pandangarannya, tapi inya tarsasat apa bulih buat, parlu kita renungkan bersama. Mudahan kita jadi urang nang lurus jangan jadi urang nang tarsasat nitu buhannya ai.

”Urang nitu hawas banar matanya malihat tapi tatap tacabur Bus ai?” ujar Palui ka Garbus.

“Umpat telerkah inya, jadi tacabur bajalan, mau haja saku, maklum wayahni banyak urang katuju bamaukan, bilang kada ham,” sahut Garbus.

“Kamana Lui manggunakan mata jadi tacabur inya nitu?” takun Tulamak.

“Inya nitu malihat hawas banar Mak ai, tapi buta mata hatinya, makanya gawiannya salah tarus, nang haram-haram digawinya,” jalas Palui.

“Uh damintukah Lui maksud ikam, malihat tapi mata hatinya nang buta, jadi rampak tarus iya kada? Bulan puasa saparti ni nah masih haja maksiat, puasa kada, salat kada, gawian manyuntan, manjambret, nitu nang ngarannya buta hati iyakah Lui?” sahut Garbus.

“Iya Bus ai, Mak ai, mangarti kalu nang kumaksud urangnya hawas panjanak, tapi buta mata hatinya. Nitu nang ngalih banar buhannya ai, urang sekadar mamandang haja, manasihati kada wani jua, kalu dipukulnya. Allah Taala haja lagi nang maadilinya, bila barbuat jahat , neraka kena upahnya, bila barbuat baik , mata hati terang benderang handak barbuat baik tarus, surga kena upahnya,” Palui manambahi panjalasannya.

“Jar ikam tadi tuli, tapi talinganya baik banar pandangarannya, maka ikam sambat tulikah Lui,” Tulamak bingung.

“Inya nitu mandangar haja, tapi tuli hatinya, kada mau badadangar urang betausiah di masjid, di langgar, di majelis taklim, tapi inya katuju badadangar urang nang manggunjing, mamfitnah, katuju inya. Punya talinga tapi kada mandangar alias tuli, karana inya kada mau manggunakan kesempatan badadangar nang baik-baik, saparti jarku tadi ceramah tuan guru,” Palui lantih.

“Jadi baisi talinga tulung gunakan gasan badadangar nang baik-baik Mak ai” Garbus banasihat jua.

“Ayuha Bus ai, Lui ai, tampulu bulan puasa naya, aku baiknya badadangar ha ka masjid urang tausiah habis salat Dzuhur di masjid Agung, maka tuan gurunya nang tarkenal di banua anam,” sahut Tulamak sakalinya.

“Pas haja kita ya ka masjid Agung daripada guring, kena mangaruh, akhirnya makruh puasa kita, iya kada Mak?” Palui mambawai ka masjidan.

Han jarku marasa haja sudah tuha umur buhannya ni, hakun haja badadangar tuan guru tausiah, daripada badumlah, bahampas buyang mahadang-hadang hari sanja, labih baik banyaki ka masjid haja, apalagi sabulanan ni di masjid-masjid mambuka akan urang puasa.

“Mudahan kita panjang umur buhannya ai, kawa kita tunai sabulanan penuh bapuasa?” sahut Palui. (aan maulana/penulis matan kuta dudul,HSS)

Editor: Elpianur Achmad
Ikuti kami di
KOMENTAR

BERITA TERKINI

TRIBUNnews.com Network © 2018
About Us
Help