Si Palui

Si Palui: Sasain Bamaju

TARUS tarang haja di langgar atau masjid nang ngarannya tarawih, ada nang katuju lakas atau nang sadang, atau adakah nang kada katuju tarawih.

Si Palui: Sasain Bamaju
Bpost/Riza
Ilustrasi Palui 

TARUS tarang haja di langgar atau masjid nang ngarannya tarawih, ada nang katuju lakas atau nang sadang, atau adakah nang kada katuju tarawih. Sasain bamaju haja di langgar Palui naya, padahal dihitung-hitung warga masyarakat di kampung Palui ni labih 250 jiwa, tapi nang Ka langgar di kampungnya sakitar 20-an haja terutama nang laki-lakinya.

”Sasain bamaju pambangunankah, sampai ka buncu-buncu kampung maksud ikam?” takun Garbus bingung.

“Nitu bujur Bus ai, kalau pambangunan sampai ka buncu-buncu kampung sudah maju, tapi maksudku lain nitu pulang nah,” sahut Palui.

“Jadi apa maksud ikam Lui?” Tulamak handak tahu.

“Kita nang tarawih saban malam ni, terutama di langgar kita sorang di kampung, jumlahnya sasain bamaju, maksudnya kalau dahulu malam partama sabanyak 4 saf, wayahini sapuluh malam terakhir sakitar 2 saf kurang haja sudah, kamanaan buhannya!” Palui sadih.

“Uh aku kira dimana-mana Lui ai,, bila handak hari raya ni jamaah tarawih bakurang banar, kira-kira urang banyak kaparluan, saparti handak manukar baju hanyar gasan anak bini, jadi urang rami ka pasaran atau ka mall, Lui ai?” tangguh Garbus.
Kada lawas datang Tuhirang kawal Palui, mamaraki ka buhannya nitu nang dudukan di teras langgar.”Nah napa ikam Tuhirang jadi hanyar datang?” takun Palui.

‘Akukah datang di pasar, rami banar Lui ai, manukarakan baju hanyar anak, banyak diskonnya,” sahut Tuhirang.

“Bah iya pang ikam naya, hakun kada salat tarawih asal ka pasar dahulu, kaya apa ikam ni kada cagar matikah?Wayahni umur kada babau Tuhirang, biar langkar, bungas, anum, banyak baharta, jadi panguasa, mun sampai parjanjian kontrak hidup, mati ikam Tuhirang kada manamuni lagi ka bulan puasa nang akan datang?” Palui managur ka Tuhirang.

“Anakku Lui ai, manangsa banar batagihan minta bawa ka pasar malam,” jawab Tuhirang pina pucat muhanya.

“Urang te Tuhirang ai, kena haja dahulu ka pasar atau ka mall, tarawih dahulu kaya buhan Garbus wan Tulamak nih, sudah nitu hanyar bajalan ka pasarkah silahkan haja, ni langgar kita sasain bamaju haja safnya,” Palui manambahi kada asaan wan ka Tuhirang nitu.

“Uh damintukah Lui, aku muhun maaf ai nah, anakku maharung banar inya, jadi kada purun kada mambawa ka pasar malam,” sambung Tuhirang.

“Malam isuklah kita ka langgaran berataan, tampulu masih tarsisa bulan puasa, nyaman rami kita bedarau besalawat, bulan puasa tahun kena belum tentu kita betamuan, nitu sudah rancak aku sambat ya?”Palui bapapadah banar ka kawalnya.

Imbah diimbau Palui, sakalinya urang-urang di kampung Palui rami pulang ka langgaran saparti malam partama dulu, urang sadar bulan puasa tahun ni siapa tahu bulan puasa terakhir, kada betamuan lagi wan bulan puasa tahun nang akan datang, iya kada? Karana urangnya sudah masuk kubur..mudahan kita panjang umur, disehatkan badan ulih Allah SWT , amien. (aan maulana/penulis matan kuta dudul,HSS)

Editor: Elpianur Achmad
Ikuti kami di
KOMENTAR
TRIBUNnews.com Network © 2018
About Us
Help