Si Palui

Si Palui : 1000 Bulan

RAMI bila malam bulan puasa urang pasti mengintip atau mengintai, mahadang-hadang malam 1000 (saribu) bulan

Si Palui : 1000 Bulan
dokumen
Si Palui 

RAMI bila malam bulan puasa urang pasti mengintip atau mengintai, mahadang-hadang malam 1000 (saribu) bulan, atau jar urang wayahni malam Lailataul Qadar. Banyak urang khususnya di malam sapuluh tarakhir di bulan puasa ni malakukan iktikaf di masjid, tujuannya betamuan wan malam saribu bulan.

Palui umpat jua baiktikaf ka masjid, nang urang banyak nitu. Banyak wiridan nang dibaca jamaah, maumpati imam atau ustadz nang mamimpinnya, saparti baca shalawat, istighfar, zikir,, baca yasin, waqiah, tabarak, wan banyak macam salat sunat lainnya. Pukuknya matan jam 1 sampai jam 3 dinihari hanyar tuntung.

”Banyaklah abahnya urang ka masjid malaksanakan iktikaf?” takun bini Palui.
“Uh hibak masjid kaya salat Jumahat jua banyak urangnya,” sahut Palui.
“Lakian hajakah atau ada jua jamaah biniannya?” nang bini betakun tarus.

“Jamaah biniannya umpat jua baiktikaf,” ucap Palui, “tapi ikam kada usah umpat, tunggu rumah haja, cukup aku sorangan ka masjid.”

Kisah iktikaf tadi merinding bulu awak , karana banyak nang manangis merasa banyak banar badosa salama hidup di dunia ni.

Baper samuaan , artinya bawa perasaan samuanya karana marasa banar diri nang dhaif ni, kada bedaya apa-apa kecuali mun kada kahandak Ilahi, hanyar kawa bagarak, atau badiam, baduduk, bajalan samuan atas kahandak-Nya, makanya jangan sombong, jangan angkuh, kalu kada kekuasaan Tuhan kada bedaya apa-apa. Palui basah jua pasujudan taumpat manangis di masjid urang baiktikaf nitu.

Tapi ada pemandangan nang menarik imbah kaluar pada masjid, balajur Palui minta kapada Allah Taala, mana saribu bulannya di atas langit , apa ya sabutingannya bulan nah.

“Uh Lui, napa maka ikam mancari saribu bulan, nitu amsal haja haja Lui ai, bila kita baibadah pas turun Lailatul Qadar maka sama wan saribu bulan, maksudnya 83 tahun labih, ibadah kita malam ni hitungannya, ni haja pang nang aku tahu nah,” sahut Garbus.

“Uh damintukah Bus, aku te bujur harus haja, kukira saribu bulan di atas langit, makanya mana jarku bulannya nitu?” ujar Palui polos.

“Han jarku rami kalu urang bekawan wan Palui naya, urangnya bujur harus haja dikawani, kada betaha kada jujur, inya jujur banar,” sahut jua Tulamak.

“Nang panting bujur-bujur umpat baiktikaf Lui ai, ka masjid urang jua sapuluh malam tarakhir, malihat atau kada malihat malam saribu bulan nitu, pukuknya kita isi wan ibadah, iya kada?” Tuhirang nang rajin ka masjid umpat jua inya basuara.

“Rasa nyaman kalu Lui, hati rasa tenang wan damai, bila kita umpat baiktikaf naya,bukannya kita asa paharatnya pang dalam baribadah, tapi sudah manjadi kabutuhan batin kita maisi bulan Ramadhan nang sabantar lagi barlalu ni,” timpal Garbus.

“Umai nah buhannyalah, asa marinding bulu awak, karana bulan puasa cagar maninggalakan kita, mudahan ai, tahun kena betamuan pulang kita berataan wan bulan puasa,” ujar Palui pina sadih.

“Napa Lui pina sadih muha?” takun Tulamak.

“Iya itu tadi, bulan puasa cagar maninggalakan kita barataan, maka kadada lagi nang ngarannya iktikaf sapuluh malam tarakhir ni nah?” sambat Palui, jadi sadih barataan buhannya cagar bapisah wan bulan puasa tahun ni.`

Editor: Elpianur Achmad
Ikuti kami di
KOMENTAR

BERITA TERKINI

berita POPULER

TRIBUNnews.com Network © 2018
About Us
Help