Si Palui

Si Palui: Paling Ringan

“Salah samuanya, nang paling ringan wan siapa haja suah malakukannya adalah maninggalakan salat"

Si Palui: Paling Ringan
Bpost/Riza
Ilustrasi Palui 

“Inya napa abahnya, urang salat maka disambat celaka, ajaran apa pulang pian ni, maniniwas pada urang lain kah!?” nang bini tasinggung diusik-usik masalah salat nitu.

“Nah kaya ni, ujar Tuhan celakalah bagi urang nang malalaikan salat, apalagi kada salat sama sekali, mangartilah maksudku!” jalas Palui bahimat.

“Uh jadi ulun ni tamasuk urang lalai salatkah!?” sindir nang bini tatap haja pina sinis.

“Iya haja ah, kada marasakah ikam! Sudah sampai salat Dzuhur masih asyik manuntun sinetron, kena haja jar malaksanakan salat Dzuhur handak bagampir wan salat Asar, kalu kaya nitu baulah paraturan sorang ai ikam!” sarik Palui.

Imbah ditagur Palui pina karas nitu, lakas nang bini mamatikan ka tv nang sadang asyik dituntunnya.
”Ayuha nah daripada behual dua laki bini, labih ulun salat Dzuhur ha, balakas, kena-kena akhirnya kada salat akhirnya…,” gagarunum bini Palui, tapi hakun maasi ujar laki sakalinya.

“Aku jalaskan umanya ai, amalan nang paling baik dilakukan adalah salat di awal waktu, ya aku nih kaya apa haja sibuknya, kusampatakan salat bajamaah ka masjid Takwa atau ka masjid manakah dimana sorang pas barada, tinggalakan urusan dunia nitu,” papadah Palui sudah kawa lihum dibanding sabalumnya tadi banyak sarik.

“Ampih ulun abahnya ai, malalaikan salat lima waktu nah, apalagi kada salat,” ucap nang bini sahabis salat Dzuhur nitu.

Manggandeng Palui ka binihandak manuju kamar.

”Eh abahnya nah, jangan dahulu ni masih siang bolong harinya, kena haja malam ulun barii pian,” sambat nang bini. Takurasam Palui muhanya. Mahadang malam kah? (aan maulana/penulis matan kuta dudul, HSS)

Editor: Didik Trio
Ikuti kami di
KOMENTAR

BERITA TERKINI

berita POPULER

© 2018 TRIBUNnews.com Network,a subsidiary of KG Media.
All Right Reserved