Si Palui

Si Palui: Ada Akhirnya

“Kada ham aku Bus ai, masih suka beritikaf, maski kada di masjid lagi nah, aku di rumah atau duduk di ambin naya"

Si Palui: Ada Akhirnya
Bpost/Riza
Ilustrasi Palui

BARUMAH megah, bamubil mewah itu tujuan banyak manusia. Harta berlimpah, baju tapih bagus, perhiasan wah, rekreasi nang saraba larang ditulaki, itu tujuan banyak manusia. Namun samuaan itu ada akhirnya julak ai.

”Napa pulang Lui pina taungut, imbah habis pancucukan samalam ya?”rawa Garbus.

“Kada ham aku Bus ai, masih suka beritikaf, maski kada di masjid lagi nah, aku di rumah atau duduk di ambin naya,” sahut Palui enteng.

“Napa te nang ikam pikirakan Lui, kalahkah calon nang ikam pilih?” takun Tulamak.

“Kada soal pilkada pang, Mak ai. Kaya ni Mak lah, biar urang itu bos amas hirang, amas kuning, bos perumahan, bos travel, wan bos-bos lainnya, baisi harta sagunung atau talu gunung, bini dua atau talu, tapi tokh ada akhirnya,” lanjut Palui.

“Maksudnya apa Lui?” Garbus handak tahu jua.

“Han kaya apa buhan ikam ni masih kada tahu lagi jawabnya?” sindir Palui.

“Iya kada tahu Lui ai, makanya kami manyasal bulan puasa tadi kada suah umpat itikaf di masjid Ar Raudhah jadi pang kada tahu parkambangannya,” Tulamak marasa manyasal banar inya.

“Biar sugih buhannya ai,h arta barlimpah saparti kusambat parmulaan tadi, bini banyak, ada akhirnya, maksudnya samuaan nitu akan sirna, karana si bos nitu hidupnya barakhir alias maninggal dunia. Napa nang dibawa ka kubur nah? Kada lain kafan haja, amal jahat wan amal saleh, salain nitu kadada lagi nang dibawa, kaya harta, pakaian, bini atau laki, anak, atau barang kasukaan lainnya kada hakun umpat masuk ka dalam kubur. Bajanji sahidup samati dusta haja, pas mati laki kada hakun jua ai babuat ka dalam kubur maumpati laki maninggal dunia. Manggarung tangis nang bini, eh sakalinya balum manyaratus, sudah balaki, nitu ngaraannya malanggar massa iddah buhannya ai?” sindir Palui.

“Tapi kita barharap kadada pang nang kaya nitu sifatnya?” sambat Tulamak manggamati ka Palui.

Halaman
12
Editor: Didik Trio
Ikuti kami di
KOMENTAR

BERITA TERKINI

TRIBUNnews.com Network © 2018
About Us
Help