Si Palui

Si Palui: Kada Disangka

“Ada haja Bus ai, sidin hidup di kuta dudul jua, sabanarnya nyaman haja bila handak betamuan wan sidin"

Si Palui: Kada Disangka
dokumen banjarmasinpost.co.id
Si Palui 

“Tapi ada jua pang kalu Lui, nang salat Subuh buhan padagang nitu?” sela Garbus.

“Ya bujur Bus ai, ada haja jua nang salat Subuh, ditinggalakannya jual beli, nang kada salat mungkin labih banyak lagi,” Palui bisa manangguh.

“Napa sidin kada bajualan subuh?” takun Garbus maanyaki.

“Uh bujur Bus lah, sidin salat Subuh dahulu wan wiridannya, sampai tuntung pukul 6 hanyar berangkat ka pasar, jadi urang banyak sudah bulikan karana habis dagangan pada subuh nitu, sidin hanyar datang, pas kada barapa lawas bajualan pukul 8 nitu disuruhakan ulih patugas supaya ampih bajualan di pinggir jalan, atau di muka tuku urang, lakas haja ulih nang ampun tuku inya handak segera buka tukunya,” Palui manjalasakan.

“Apa dagangan sidin Lui?” Tulamak handak tahu inya.

Dagangan sidin pakaian bekas layak pakai,” jawab Palui.

“Apa te nang kada disangka bagi sidin?” sambung Garbus.

‘Sidin nitu sakalinya diumrahakan ulih kaluarga sidin nang jauh, sapupu dua kali, nang begana di Kutabaru sana, kada disangka-sangka tulak umrah kaya urang baduit jua, padahal duit gasan dimakan haja paribahasanya kada cukup, mimpi haja bila kawa tulak umrah nitu ya?” ujar Palui asa himung manjalasakan ka buhannya.

“Sakalinya umrah jadi kanyataan, iya kada Lui?” tambah Garbus.

“Bujur Bus ai, jadi palajaran nang kita ambil jangan suah maninggalakan kawajiban salat Subuh, nitu pintu razaki, tapi kita kada tahu kabanyakannya, parasaan te badagang waktu urang azan Subuh nitu pintu razaki inya haratan rami batransaksi, padahal tidak, iya kalu?” Palui sakali ni banyak bapander. (aan maulana/penulis matan kuta dudul, HSS)

Editor: Didik Trio
Ikuti kami di
KOMENTAR

BERITA TERKINI

berita POPULER

TRIBUNnews.com Network © 2018
About Us
Help