Si Palui

Si Palui: Makan di Kantor (1)

Mulai hari Sanayan 8 Agustus lalu secara batahap di Kalimantan Selatan masuk kantor pukul 07.30, istirahat siang

Si Palui: Makan di Kantor (1)
dokumen bpost
Si Palui 

Tulak ai si Palui ka kantor dengan wajah cerah menyambut program hanyar Menteri Pendayagunaan Aparatur Negara.

Sampai di kantor, umpat apel pagi. Habis apel pagi inya dikiau bossnya kapala seksi. “Napa pulang kasalahanku jadi dikiau boss. Bisa katahuan sidin aku balum maatar surat nang hari Sabtu samalam,” pikir si Palui.

“Palui! ujar bossnya, “ikam sudah siapkah mensukseskan program 5 hari kerja dalam saminggu!?
“Sudah bah-ai,” ujar si Palui, “ulun bahkan batekad kada menggunakan waktu istirahat, ulun siap mental bulik sampai satangah lima sanja.”

“Bagus kalu nang kaya itu. Apabila samuaan pagawai nang disini bapikiran nang kaya ikam, bakal kadada lagi tumpukan kerja di atas meja,” ujar bossnya.

“Surat nang sabtu samalam pang sudah dikirimlah?” takut si boss.

“Hari ini bah ai mahabis akan maantar,” hancap Palui manjawab.

“Itu surat penting, undangan rapat hari Selasa,” ujar nang si boss pulang.

Diambil Palui ai surat undangan nang balum habis diatar. Imbah manjumput ka dalam tas palastik wadah nasi tadi, pucat muha si Palui. “Astaga!” ujar si Palui malihat amplok surat undangan limbui lawan kuah gangan kaladi.

Antara dua surat undangan nang tatumpah gangan kaladi tadi, ada sabuting nang pina kawa dipikirakan. Dicoba Palui mambarasihi lawan kain basah. Limbah pina barasih dijamurnya di panas matahari. Katikan surat nang pina kabur ditimbalinya baasa lawan mesin tik. Alhamdulillah, ujar si Palui dalam hati, salamat sudah amplok undangan nang sabuting nanginih. Nang sabutingnya lagi makaam, aku manyarah. Amun parak panggal dua. Jadi apakah, jadi apakah kaina. Pimput sudah akalku mamikirakan, ujar Palui marista.

Badadas Palui maatar ka alamatnya. Itu gin kada langsung maunjuk lawan tata usaha, diunjuknya ka piket haja. Takutan kalu ditakunakan urang, kanapa jadi pina batual surat ini.
Habis maatar surat mahancap Palui ka kantor. Kalu ada pulang tugas hanyar nang harus digawinya. (HYA)

Editor: Didik Trio
Ikuti kami di
KOMENTAR

BERITA TERKINI

TRIBUNnews.com Network © 2018
About Us
Help