Si Palui

Si Palui: Kuketek Kepalanya! (1)

PALUI laki binian naik haji. Tuhuk jua sudah rupanya mahajiakan urang, dan tuhuk lawan rancak-rancaknya manulakakan urang haji

Si Palui: Kuketek Kepalanya! (1)
Bpost/Riza
Ilustrasi Palui 

PALUI laki binian naik haji. Tuhuk jua sudah rupanya mahajiakan urang, dan tuhuk lawan rancak-rancaknya manulakakan urang haji. Kalu urang nang balabihan duit, mahajiakan dan manulakakan urang haji artinya maongkosi urang sakira kawa tulak ka Makah, tapi Palui cukup aja baucap, “Ka mana pahaji?” Kalu tadapat di jalan lawan urang nang sudah tulak haji, wan cukup maelangi atawa umpat manulakakan ka lapangan kalu ada kulawarga atawa kakawalan nang naik haji.

Anak-anak Palui handak ai umpatan tulak jua. Handak ai inya laki binian mambawa anak-anaknya. Tapi nang kaya apa amun duitnya babayanya jua. Sangkal banar pang inya, lantaran waktu manulakakan di Lapangan Syamsuddin Noor bilang limbah limburan banyu mata anaknya. Tapaksa Palui laki binian umpat manangis sambil maragapi dan manciumi anak-anaknya saban ikungan, nang bapiruhut di puhun gulunya kada sing lapasan.

Tagal ada nang kada kawa ditinggalnya. Lain pada bininya, kainya tulak jua baimbai lawan inya laki bini. Padahal, mun dilihat umur, kainya itu bilang parak gim. Sudah dalapan puluh tahun umur sidin. Amun dihitung manurut tahun Hijriyah labih tuha lagi!

Malihat Palui ungut-ungut, paham ai sidin, nang Palui laki bini ada rasa kabaratan kalu sidin umpat bamuhrim.

“Insyaallah kai kada cagaran mangalihi ikam badua,” ujar kai baucap.“ Aku masih cukup sehat.”

“Kanapa garang kai, waktu pian masih anum kada handak tulak naik haji, jadi mahadang sudah tuha banar ?” ujar si Palui manyahuti.

“Naaah ikam, rupanya kada sampai pikiran ikam,” kai manyahut. “Jaka bahari-bahari tu aku cukup duit, kada sampai parak mati ini pang hanyar aku tatulak! Amun tahun ini aku kada tulak, baluman tantu umurku panjang sampai satahun lagi!” jar sidin pina sarik.

Limbah itu Palui kada babunyi lagi. Inya baniat dalam hati, nangapa aja kaparluan kainya, inya cagar mananganinya. Mulai tulak, sampai bulikan bahaji, amun panjang umur jua pang, inya kada handak mamisahi barang sahari lawan si kai.

Manyasal banar inya sampai ada parasaan kada nyaman waktu handak diumpati kainya tu tadi, lalu inya baistigfar lawan Tuhan, maminta ampun, dan sujud mancium tangan kainya sambil banyu mata batitikan.

Waktu tulak ka Surabaya, di kapal terbang kada sing pisahan duduk lawan Palui. Ikat pinggang dipasangakan.Maklum aja pang, nang ngaran kainya. Tas tentengan kada dibariakan Palui maangkat sorang, inya nang maangkatakan.

Halaman
123
Editor: Didik Trio
Ikuti kami di
KOMENTAR

BERITA TERKINI

TRIBUNnews.com Network © 2018
About Us
Help