Si Palui

Si Palui: Kuketek Kepalanya! (1)

PALUI laki binian naik haji. Tuhuk jua sudah rupanya mahajiakan urang, dan tuhuk lawan rancak-rancaknya manulakakan urang haji

Si Palui: Kuketek Kepalanya! (1)
Bpost/Riza
Ilustrasi Palui 

Nang kaya itu jua waktu tulak ka Jedah tumatan lapangan terbang Juanda ka Jedah.Si kai duduk di tangah, dan si Palui lawan bininya manggapit di higa-mahiganya.

“Lihati kai, tuh, pramugari maragaakan nang kaya apa mamakai palampung kalu kita dalam kaadaan darurat,” ujar si Palui sambil manunjuk ka pramugari nang lagi maragaakan nang kaya apa cara mamakai palampung, cara manggalambungakannya, cara manyalaakan lampunya, dan cara manggunaakan jat asam.

Kainya si Palui kalihatannya mamparhatiakan banar lawan pramugari nang lagi maragaaakan itu. Satutumat kalihatan halukum sidin turun naik lantaran sidin managuk liur rupanya. Bujur sudah tuha macam itu, pina baliur jua sidin malihat pramugari nang dasar langkar jua. Si Palui manyirit lawan si kai sambil lihum-lihum aja malihatakan sidin.

“Rasa satumat banar,” ujar kai baucap waktu pramugari tuntung maragaakan. “Mustinya lawasi lagi!” Palui lawan bininya pupura kada mandangar, tapi lihum-lihum pulang sambil basisiritan laki bini. Kada sampat lawas limbah itu ada pangumuman malalui mik.

- “Dangarakan kai, itu ada pangumuman gasan kita jamaah panumpang,” ujar si Palui baucap pulang.

Kadangaran suara pramugari maumumakan, nang kaya apa mustinya kalu handak bakamih atawa bahera di toilet kapal terbang, sakira toilet atawa wc kada rigat dan banyu kada tabuang-buang mambasahi lantai. Bahimat si kai mandangarakan.

Limbah tuntung pangumuman, sidin baucap; “Mustinya itu diragaakan oleh pramugari!”

“Dasar baik jua liur!” ujar si Palui dalam hati. “Aku gin sama aja! Tagal ada pulisi banar ai di higa !”

Bini si Palui taguring. Rupanya rasa kanyamanan duduk di kursi nang bakasandaran. Kasandarannya kawa dirabahakan nang kaya kursi malas, apalagi hawanya nyaman lantaran ba-AC. Kada tahu lagi inya pramugari maatarakan papuluran alias snek. Meja di hadapannya gin pramugari nang mambukaakan. Palui nginum kopi lawan makan wadai nang disadiaakan pramugari.

Palui manyirit malihat si kai. Makanan lawan kopi di hadapan sidin pina kada tagarak.

Halaman
123
Editor: Didik Trio
Ikuti kami di
KOMENTAR

BERITA TERKINI

berita POPULER

TRIBUNnews.com Network © 2018
About Us
Help