Si Palui

Si Palui: Lumpuh (1)

WAKTU duduk baimbai kai, limbah sidin tuntung bakamih di toilet, Palui satumat-tumat lihum, satumat-satumat lihum saurangan.

Si Palui: Lumpuh (1)
dokumen
Si Palui 

BANJARMASINPOST.CO.ID - WAKTU duduk baimbai kai, limbah sidin tuntung bakamih di toilet, Palui satumat-tumat lihum, satumat-satumat lihum saurangan. Dibayangakan Palui, nang kaya apa tadi kai “mangetek kapalanya” sakira inya ampih supan dan mau takamih.

“Kanapa jadi lihum saurangan?” Bini Palui managur, sebab rupanya tumatan tadi manyirit aja mahatiakan kalakuan Palui. “Sampai ka Makah kaena kalu tang sinting ja!” gagarunum nang bini.

Palui mangesahakan lawan bininya apa nang digawi kainya tadi. Bininya kada kawa mahariti tatawa, mangangkang inya saurangan limbah mandangar kesah Palui, sampai jamaah panumpang nang parak cengang lawan inya.

Kai pupura guring. Sidin kada baminat mandangar. Rasa supan jua sidin rupanya sampai kalakuan sidin di toilet itu katahuan bini Palui. Bini Palui badadas manukup muntungnya lawan tangan sambil bapicik parut.

“Baiknya kita guringan aja,” ujar Palui sambil marabahakan kasandaran kursinya sakira nyaman basandar. “Dua belas jam kita duduk macam ini hanyar sampai ka lapangan terbang King Abdulazis di Jedah,” jarnya pulang.

Panumpang kalihatannya mangantukan samuanya. Kai bujuran taguring, Balilihan liur sidin. Maklum aja pang sidin sudah kada bagigi lagi.

Bini si Palui kada kawa guring. Matanya mangantuk, tagal hatinya tarus haja kada mau guring. Anak-anaknya nang maulah inya macam itu. Inya tarus kaingatan lawan anak-anaknya nang tatinggal di banua.

Lain rupanya lawan Palui. Soal kaganangan lawan anak di rumah, siapa nang kada kaganangan, tapi kalu mata mangantuk, musti dibawa guring. Lalu inya guring jua kaya kai. Rasa rarawaian aja inya mandangar pangumuman, kapal terbang singgah di lapangan Don Muang di Bangkok, bamandak di situ kira-kira sajam.

“Kita cuma mangisi bahan bakar,” ujar pilot maumumakan, “Mengisi bahan bakar saja, dan semua penumpang harus tetap di pesawat.”
Rasa rarawaian jua inya mandangar pina banyak urang naikan ka dalam kapal terbang, bujur ai, patugas-patugas lapangan Don Muang naikan mambarasihi toilet. Limbah itu haruk ai pulang inya.

Kada tahu lagi inya kapal terbang naik pulang, manarusakan parjalanan manuju King Abdulaziz di Jedah.

Palui tabangun lagi waktu ada pangumuman, kapal terbang handak turun di King Abdulaziz. “Harap penumpang menegakkan sandaran kursi, memasang sabuk pengaman, dan berhenti merokok bila tanda dilarang merokok dinyalakan,” ujar bunyi pangumuman.

Halaman
12
Editor: Elpianur Achmad
Ikuti kami di
KOMENTAR

BERITA TERKINI

berita POPULER

TRIBUNnews.com Network © 2018
About Us
Help