Si Palui

Si Palui: Susu Rabuk

Ada jua nang dasar sudah taniat tumatan di banua, kada cagaran handak bangalih-ngalih salawas manunaikan ibadah haji.

Si Palui: Susu Rabuk
Si Palui ke Tanah Suci

BANJARMASINPOST.CO.ID - Waktu handak tulak ka Madinah, di Jedah jamaah haji dapat saharah, jatah bahan makanan. Ada baras, mi, gula, iwak, dan macam-macam lagi. Ada jua jamaah nang kada hakun mambawanya. Macam-macam pang alasannya. Ada nang koler lantaran cukup barat, jadi indah ngalih. Ada jua nang dasar sudah taniat tumatan di banua, kada cagaran handak bangalih-ngalih salawas manunaikan ibadah haji.

“Kami makan di luar aja kaena,” ujar si Iyur laki-binian. Koler bamasak saurang!
Si Palui lain pulang pikirannya.

“Sayangnya amun kada dibawa, ujarnya baalasan lawan bininya, nang handak koler jua mambawa, sebab inya nang cagar uyuh kaena jadi tukang masak, -Saharah ini tumatan duit kita nang disetor itu jua manukarnya!”

Pikiran si Palui itu rupanya bujur lawan banar. Sebab limbah sudah di Madinah, hanyar bininya mambujurakan. Si Palui laki-bini, si Iyur laki-bini, dan si Ucui laki-bini, samaktab di Madinah. Kada jauh pada masjid Nabawi, tapi jauh lawan rumah makan urang Banjar nang bamukim di sana. Sakali, limbah bulik makanan tumatan di sana, sampai di maktab, taampar bini si Palui.

“Kanapa, kauyuhankah?” ujar si Palui manakuni, padahal sudah malihat aja bininya taampar di kaguringan, artinya dasar uyuh babanaran.

“Amun uyuh tu kukurang labih aja,” bininya manyahuti. Tapi ini lawan lalaparnya pulang! Parcuma ai makan, amun bulik ka rumah lapar pulang!

“Naaa, iya kalu?” ujar si Palui. “Nang kaya itu nang kutahaakan. Itu am maka aku hakun bangalih mambawa saharah nang dibagiakan gasan kita! Jadi banyak bamasak saurang aja kita. Kaena amun muyak, sakali-sakali kawa aja makan ka sana pulang!”

Bulikan balohor di masjid Nabawi handak bamasak gasan makan siang. Lain pada alat dapur nang singaja dibawanya tumatan di banua, limbah sembahyang subuh baisukan tadi tulak ka pasar manukar sagala kompor listrik, cirat gasan manjarang banyu dan kaparluan lain lagi sakira nyaman.

Sambil manjarang banyu, bini si Palui mambongkari isi kadut saharah. Ada kopi, ada teh, ada gula, mi super, kornet bip, dan apakah lagi.

“Pas banar,“ ujar si Palui nang umpat jua babobongkar isi saharah tu tadi.
“Ini ada susu rabuk! Kita baulah kopi susu ja dahulu, hanyar bamasak! Kiau bubuhan Ucui dan Iyur laki-bini!”

Bini si Palui mangaluarakan gelas plastik bawaannya. Salusin inya mambawa tumatan di banua. Dikaluarakannya anam buah.

Dibuatinya gula, kopi, lalu susu rabuk. Limbah itu hanyar dibuatinya banyu panas. Diharunya tunggal buahan, sampai gulanya hancur dan kopi lawan susu mesra bacampur. Samantara itu Ucui dan Iyur sudah masukan dan dudukan.

“Kita nginuman dahulu,” ujar si Palui, sambil badahulu maangkat gelas ka bibirnya.

Limbah mahirup sakali tu, gelas diandaknya. Diitihinya bininya, lyur, bini lyur, Ucui, bini Ucui, sama kada labih pada sakali mahirup, limbah itu maandak ai ka gelas. Hilang manisnya, timbul masin banar aja lagi. Apa mun uyah dikira susu rabuk!! (HYA)

Editor: Elpianur Achmad
Ikuti kami di
KOMENTAR

BERITA TERKINI

© 2018 TRIBUNnews.com Network,a subsidiary of KG Media.
All Right Reserved