Si Palui

Si Palui: Kupiah (2)

Hatinya mambarangat. Palui nang tumatan pukul sambilan mancari sap nang tanyaman, dikalahakan oleh bubuhannya nang tadudi.

Si Palui: Kupiah (2)
Bpost/Riza
Ilustrasi Palui 

BANJARMASINPOST.CO.ID - SAJAM sudah kira-kira inya di Masjid Nabawi. Inya kahausan. Maklum aja pang, hawa di Medinah sasain panas. Dilingirnya banyu zamzam tumatan kran pait plastik nang baandak di higa tihang. Bahalat dua atawa tiga tihang, musti ada pait nang baisi banyu zamzam gasan jamaah nang kahausan. Kalu habis isinya, lalu diisi oleh dallah, patugas di masjid. Kada suah kosong pait itu tadi. Jadi jamaah nang ada di Masjid kada sempat kahausan.

Jamaah sasain banyak nang datang ka masjid. Sap nang tadinya balum baisi di higa mahiga Palui, sudah mulai hibak dan sasain sasak. Palui nang tadinya kawa duduk pina santai, sudah mulai takapit. Soalnya jamaah batambah tarus, masuk ka masjid, dan singaja bakajal.

Sudah tahu aja sap sudah sasak, datang tadudi pulang, tatap aja mancari wadah di muka, akibatnya urang nang tadahulu datang tasusulait. Macam Palui, awak sudah kihit, tapi nang bakajal kakaya raksasa, apa ada, bilang kahada kawa bagarak lagi ai inya. Kada kawa basila duduk. Tapaksa batalempoh aja. Bahu gin kada kawa manggarak lagi.

“Astagpirullaaah !!!, kaya apa solat kalu macam ini! ujar di dalam hati.

Hatinya mambarangat. Palui nang tumatan pukul sambilan mancari sap nang tanyaman, dikalahakan oleh bubuhannya nang tadudi.

“Iblis kalu nang katuju bakajal di sap nang sudah hibak! hati Palui mangomel. Astagpirulaaah! Kada boleh aku bapikiran macam itu!”

Disabarakannya hatinya. Palui maminta ampun lawan Tuhan. Samunyaan jamaah nang datang tumatan mana aja, handak manjalanakan ibadat dan mandapat pahala sebanyak-banyaknya. Ingat ka situ, hati Palui mulai dingin dan sabar.

Kada karasaan lagi, waktu Dzhuhur sudah sampai. Kadangaran suara bilal azan. Tuntung azan, samunyaan jamaah badiri, handak sembahyang sunat. Palui badiri jua. Kada kawa bujur-bujur mahadap kiblat lantaran kasasakan. Tapaksa bahereng sadikit.

Waktu ruku, tapaksa bahereng jua sadikit. Limbah handak sujud, sasain karasaan ngalihnya manalusakan awak. Waktu handak manggacakkan muha ka lantai, kada kawa, sebab sap di muka talalu rapat. Dikarasi, pas tahayut burit urang di sap hadapan.

Gila banar. Bubuhan Iran nang tadudi datang, tapi tatap bakaras mancari wadah di muka jua. Lantaran kada kawa bakajal lagi, lalu bubuhannya baulah sap hanyar di sasala sap nang ada. Hati Palui manyumpah. Untung lakas inya istigpar, kaingatan waktu sembahyang, pikiran musti tunggal mahadap nang satu. Tapaksa sakawa-kawanya aja sujud.

Sampai waktu rakaat ahir, sujud nang kadua. Tapaksa ai sujud saadanya pulang, kada sampai muha ka lantai. Kabiasaan Palui di rakaat ahir saban kali sembahyang, musti inya talambat duduk, sebab lain pada membaca subhanakallah, inya manambahi saurang lawan doa.

Jadi biasanya inya musti tadudi pada makmun-makmun nang lain duduk tahayat ahir. Nang kaya itu jua waktu badzuhur di masjid Nabawi itu. Waktu imam sudah “allahu akbar”, makmun nang lain duduk sabarataan, kacuali Palui, tamasuk urang Iran di hadapannya. Apa ada, pas ai taduduki kapala Palui nang masih sujud.

Palui takajut kapalanya ada nang manindihi. Badadas ai inya handak duduk jua, tapi kupiahnya tapacul pada kapalanya. Realan nang disimpannya dalam kupiah, tahamburan ai di hadapannya. Basapai di higa-mahiganya, dan di hadapan makmun nang duduk parak inya.

Marasa duitnya tahamburan, maka dua ratus real labih banyaknya, kada kaingatan lagi nang inya masih parahatan sembahyang, diputikinya duitnya nang tahamburan tu tadi, dimasukakannya pulang ka dalam kupiahnya sambil mahitung, cukup kada jumlahnya. Kalu pang ada nang takipai-kipai jauh pada hadapannya. Limbah dirasanya sudah cukup, ditajaknya pulang kupiahnya.

Hanyar inya sadar, nang sembahyangnya karam.Tapaksa inya badzuhur baasa saurangan. Tagal masih ai inya tasulapit, dan kada kakaruan kawa duduk mahadang jamaah di higa-mahiganya bulik, maka am hanyar inya kawa sembahyang. (hya)

Editor: Elpianur Achmad
Ikuti kami di
KOMENTAR

BERITA TERKINI

© 2018 TRIBUNnews.com Network,a subsidiary of KG Media.
All Right Reserved