Si Palui

Basalaman (1)

Dilihatakan, nang kaya apa sakira urang lain sasain senang dan hormat, dan katuju lawan urang Indonesia.

Basalaman (1)
Si Palui ke Tanah Suci

PALUI ingat banar lawan pesan penatar, waktu inya umpat penataran manasik haji. Jaga nama baik bangsa Indonesia, sebab di Makkah dan di Madinah kaena takumpulan lawan manusia macam-macam bangsa.

Dilihatakan, nang kaya apa sakira urang lain sasain senang dan hormat, dan katuju lawan urang Indonesia. Sebab itu palihara adab, jangan sampai dinilai urang kurang baadab alias biadab. Kalu sudah sampai macam itu, kada kita saurang aja nang supannya, samuaan bangsa kita taumpat supan jua. Apalagi kita urang Islam, nang sudah dilajari, nang kaya apa adab manurut agama kita.

Sebab itu mulai turun tumatan di rumah manuju lapangan terbang Syamsuddin Noor, sampai di Surabaya, sampai manjajak lapangan terbang King Abdulaziz di Jedah, limbah itu tarus ka Madinah, kada suah inya kalumpanan lawan pesan penatarnya nitu. Dijaganya banar sakira kalihatan barasih, rapi, dan kalihatan pina baadat.

Pesan lain nang tatap diingatakan Palui, kalu kaluar pada maktab siang hari, jangan kada mamakai payung, masker, dan mambawa semprotan batutup, artinya cahaya matahari jangan langsung kena kapala. Itu nang bisa maulah urang kejang-kejang kapanasan, dan kalu lambat manolong bisa gim salajur.

Waktu di Madinah, salawas malaksanakan salat Arbain, artinya salat ampat puluh waktu jangan sampai tatinggal akan waktu. Kalu sampat tatinggalakan, kada jadi 40 waktu ai. Maka sarat urang handak baumrah, musti malaksanakan salat 40 waktu, dan musti digawi di masjid Nabawi.

“Aku badahulu ka masjid,” ujar si Palui bapadah lawan bininya, waktu inya handak ka masjid Nabawi manunggu waktu balohor di sana. Padahal hari masih pukul sambilan.

“Kada kasawatankah?” ujar bininya, “Lawan siapa kaena aku turun?”

“Lawas di masjid, talawasi jua mambaca doa,” ujar si Palui manyahuti. “Amun handak turun kaena,biar baimbai Ucui lawan bininya!”

Palui turun, lalu mangunyur tulak ka masjid Nabawi. Dikira Palui inya saurangan jamaah nang pandahuluannya sampai di masjid Nabawi.
Kada tahu sudah banyak jua nang ada di masjid. Macam-macam bangsa nang datang. Masing-masing mamilih wadah nang cocok lawan kahandak.

Tapi Palui ada kasampatan mancari wadah, sebab jamaah masih kada talalu banyak. Inya mamilih sap nang takamuka, di higa tihang nang ada rak baisi Quran, dan wadah air zamzam.

Kalu sudah duduk di higa tihang, dan parak air zamzam, aman am sudah di masjid Nabawi ini, ujar si Palui dalam hati. Lalu diambilnya Quran sabiji, dan ditarusakannya mambaca nang kaya biasanya urang tadarus.

Tumatan di banua inya sudah taniat di dalam hati, paling kada banar talu kali inya kawa manamatakan mambaca Quran salawas musim haji di tanah suci, baik di Madinah, Mekah, Arafah atawa Mina.

Itu sebabnya, kanapa inya jadi handak basungsung tarus turun ka masjid. Kalu kada macam itu, kadada harapan tuntung pang barang sahajus. Apalagi kalu di panginapan, kadada gawian lagi pada makan, nginum, balengkor di kaguringan. Kalu sudah macam itu, pikiran balalu ka situ aja.

Tapi rupanya sakali-sakali bisa jua talambat, kauyuhan jua sakalinya. Apa mun bajalan tarus tulak dan bulikannya. Maka malaran jua pang jauhnya. Mahingal kalu sampai di panginapan atawa sampai di masjid Nabawi. (HYA)

Editor: Didik Trio
Ikuti kami di
KOMENTAR

BERITA TERKINI

TRIBUNnews.com Network © 2018
About Us
Help