Si Palui

Si Palui : Lina-Linang Banyu Mata (2)

Kalu pina banyak banar urangnya, Palui wan bininya bajalanan balilihat jujualan urang Arab nang sungsung banar buka bajualan.

Si Palui : Lina-Linang Banyu Mata (2)
Si Palui Lina-linang

TUNTUNG sembahyang subuh, umpat urang tawaf mangulilingi Kabah. Kalu pina banyak banar urangnya, Palui wan bininya bajalanan balilihat jujualan urang Arab nang sungsung banar buka bajualan.

Ada nang bajualan nang kawa gasan dibawa bulik gasan oleh-oleh, tapi banyak jua nang bajualan gasan mamanasi parut. Nah, Palui wan bininya musti singgah mangopi dahulu. Dua real sacangkir plastik. Limbah itu kaluar masuk toko, atawa malihati jujualan Arab di pipinggir jalan. Biasanya kukuciak manawarakan.

Lima real! Lima real! Bagus! Sambil manating-nating dan mangangajalakan jujualannya.

Palui lawan bininya tapaksa singgah. Batatawaran. Campur-campur bahasanya. Kalu perlu main tunjuk atawa isarat lawan tangan aja, sebab panguasaan bahasa masing-masing tabatas.

Sakira tenaga hemat, dan kada talalu uyuh bulang-bulik, sembahyang Dzohoer dan Asyar kada babulikan lagi. Kaya itu jua sembahyang Magrib wan Isa. Waktu mahadang ka Asyar atawa mahadang ka Isa digunaakan Palui gasan baamal. Kalu kada mandarasi Alquran, inya mambaca tasbih. Baistilah nukar tasbih gasan bahitung.

Hanyar aku marasa bujur-bujur baibadat salawas di Masjidilharam ini, ujar Palui dalam hati.

Kalu di banua, bilang balang kambingan. Mudahan aku panjang umur, kawa bulik lagi ka banua, dan kawa manjalanakan sembahyang lima waktu kada batitinggalan lagi.

Bahimat banar Palui baamal dan maminta ampun lawan Tuhan. Inya marasa banyak banar badosa. Banyak jua parubahan kalakuannya.

Panyabar banar, dan katuju manolong urang nang parlu ditolong.

Lawan duit kada bahitungan. Kalu taimbai nginuman limbah sembahyang Subuh, siapa aja, dibayariakannya. Lalui ai sasain banyak kapatuhannya. Kada nang sabanua aja pang, tapi urang lain gin banyak nang jadi sahabatnya.

Di dalam masjid, kalu dilihatnya ada jamaah nang kukulilik mancari wadah duduk lantaran shap sudah taisi, urang itu dikawainya.

Disuruhnya duduk di higanya. Biar aja inya tasusulapit, asal urang lain jangan sampai ada nang kada kawa sembahyang.

Lantaran kainsapannya itu rupanya, maka Palui limbah sembahyang rancak taungut. Apa nang diulahnya nang pina manyalaya, tabayang samunyaannya. Linang-linang banyu matanya kalu kaingatan samunyaan itu.
Takutan banar inya kalu mandapat balasan langsung waktu di Makah. Sebab banyak habar, apa nang pina kada baik digawi waktu di banua, dilihatakan Tuhan salawas ada di tanah haram. Katuju manampar urang, ditampar urang jua. Katuju mangganggu anak bini urang, salah-salah bisa hilang bini diculik Arab.

Lantaran takutan kalu kena kisas macam itu, maka Palui kada sing rantian baamal, baistighpar, maminta ampun dan badoa lawan Tuhan. Waktu handak turun ka Masjidilharam pulang, bininya baucap, “Limbah badzohor kita bulikan ka panginapan.”

“Mana baiknya aja,” ujar Palui manyahuti.

Padahal dalam hatinya handak banar manolak, sebab bulik tangah hari tu parahatan papanasannya. Inya indah bahual, lalu apa aja kahandak bininya diakurinya aja.

Sampai di masjid, Palui bapisah lawan bininya. Palui manggabung lawan jamaah lalakian, dan bininya manggabung lawan jamaah babinian. Tapi masing-masing sudah tahu, dan sudah bajanji, di mana kaena badapat, dan kalu ada nang talambat, didatangi ka mana, masing-masing sudah tahu jua. Limbah tuntung sembahyang Dzhor, bini Palui kaluar ai mairingi jamaah babinian nang lain, dan mahadang di luar masjid, di parak pagar panginapan negara, nang batatai lawan Masjidilharam. Biasanya, paling-paling sapuluh menit inya mahadang, cangul am Palui.

Sakali itu dihadang-hadangnya lakinya, kada jua Palui cangul. Jamaah lain nang sapanginapan sudah habisan. Banyak aja pang jamaah lain nang bajalan kaluyuran, tapi masing-masing ada kaparluannya. Panat bini Palui mahadang, sampai inya marasa waswas.
“Kamana abahnya ini maka kada sing cangulan?” ujarnya dalam hati.
Sebab kada sing cangulan jua, maka dicariinya ka sakitar halaman situ. Kalu pang tasinggah, tadapat kakawalan, lalu hayal bapander, kada kaingatan lagi di bini nang panat badiri tuhuk kapanasan mahadangi. Kadada jua rupanya.

“Nahikam am,:” ujarnya dalam hati, “Kamana jua inya?”

Dicobainya naik ka lantai dua masjid, kadada jua talihat. Naik pulang inya ka lantai tiga. Masih banyak jamaah di sana. Diitihinya tunggal ikungan.

Nah, itu inya!” ujar bininya waktu malihat ada jamaah nang duduk manyaurangan batundukan. Diparakinya, dan kada kawa disambat lagi nang kaya apa himungnya bininya malihat Palui masih ada di dalam masigit. Waktu diparakinya, dan digawilnya, Palui batingadah.

Linang-linang banyu matanya. Kada sing rantian inya maurut batis. (HYA)

Editor: Elpianur Achmad
Ikuti kami di
KOMENTAR

BERITA TERKINI

© 2018 TRIBUNnews.com Network,a subsidiary of KG Media.
All Right Reserved