Si Palui

Si Palui : Amanat (3)

Badadas bininya mamapah inya dan mambawa Palui ka dalam kamar, lalu dirabahakannya. Dicariakannya minyak angin.

Si Palui : Amanat (3)

BANJARMASINPOST.CO.ID - BININYA datang, badadas ai Palui babasuh, lalu dikakawaakannya pulang badiri. Badadas bininya mamapah inya dan mambawa Palui ka dalam kamar, lalu dirabahakannya. Dicariakannya minyak angin, diurutiakannya parut Palui, nang dikiranya masuk angin.

“Kada kurang pada salawi kali aku bahera,” ujar Palui sambil bapajaman aja.

“Kadada apa-apa lagi nang kawa kuheraakan. Habis sudah banyu awakku kuheraakan,” ujarnya pulang.

Mandam bininya mandangar. Tangannya kada sing rantian mauruti parut Palui. Bagemetan tangan Palui manyimbah tangan bininya sambil baucap, “Kada usah diurutakan lagi, kadada gunanya jua. Kukira sampai pang sudah waktuku di sini.” Mandangar itu, manggaraung ai bini si Palui manangis.

“Jangan..., jangan... tinggalakan aku saurangan di sini!!!” ujar bininya sambil manangis. “ Kasian anak-anak kita nang tatinggal di banua.”

Malihat Palui nang sudah handak sakarat macam itu, ribut ai bubuhan jamaah nang bapaparakan kamar. Lalu bahabar lawan kakawalan jamaah lainnya.

Palui bangat, tinggal kutup banar aja lagi. Muhanya sudah biru. Matanya takantup, dan kada kawa baucap lagi.

Kamar Palui lawan Iyur dan Ucui hibak lawan jamaah sakloter, lantaran sama takajut. Apalagi siangnya, malamnya bulikan tumatan Masjidilharam kalihatan sigar aja. Masing-masing bausaha mancari partolongan.

“Kiau Mantri Barito! Suriansyah aja, sabab inya nang rasmi paramedis jamaah!” kuriak jamaah.
“Jangan alang-alang, baik kiau dokter Nurul sama sakali!” ujarnya.

Banyak nang kada sampat sambahyang Subuh ka Masjidilharam, lantaran mandangar Palui handak mati.
Mantri Barito sabujurannya jamaah biasa, inya turun tumatan lantai tiga kamarnya, mambawa obat paten gasan si Palui.

“Nginumakan dua bigi sakaligus,” ujarnya.

Palui disandarakan, lalu dipaksa nginum obat dua bigi sakaligus. Babayanya Palui kawa mambuka muntung. Untung aja pang nang obatnya pil itu halus aja. Limbah sudah kawa ditaguknya, lalu dirabahakan pulang.

“Kalu kada talambat banar, insyaallah selamat,” ujar mantri Barito. “Kita doaakan ai, jangan sampai ada kalompok kita nang tatinggal di sini!”

Kada lawas imbah itu, Asmara nang bahalat tawing datang tumatan masjid. Mandangar kaadaan Palui, inya nang baistilah mambawa obat-obatan di banua manyubalah kamar jua mambawaakan obat kapsul sing banyakan.

“Untal damini jua,” ujar Asmara.
“Inya hanyar mauntal obat dua bigi pil barian mantri Barito,” ujar bini Palui manyahuti. “Kada apa-apalah mauntal obat nang lain?”

“Kada apa-apa,” ujar Asmara. “Makin banyak macamnya obat, makin lakas wigas. Cariakan umanya banyu!”

Asmara manyuruh bininya nang mambuntil tarus di balakangnya.
Tapaksa ai lantaran bingung, tapi handak lakas wigas, bini Palui manginumakan obat kapsul nang kada tahu ngarannya tu tadi ka muntung lakinya.

Waktu handak manyuapakan sabigi pulang ka muntung si Palui, ditangati oleh Asmara.
“Jangan labih pada sabigi, sebab ini obat paten. Sabigi aja cukup!” (HYA)

Editor: Elpianur Achmad
Ikuti kami di
KOMENTAR

BERITA TERKINI

© 2018 TRIBUNnews.com Network,a subsidiary of KG Media.
All Right Reserved