Si Palui

Bakalahi Bedangsanak

Abut jadinya katua RT turun tangan mandamaiakan warganya nang bakalahi, apalagi urang tuhanya sibuk urusan usaha haja

Bakalahi Bedangsanak
Bpost/Riza
Ilustrasi Palui 

SUNGGUH kaprihatinan kita samua pas malam Ahad tadi ada nang batimpasan badua bedangsanak, nang ading manimpas kapada kakaknya, luka ganal di tangan. ”Ubuilah Lui, kaya apa generasi muda kita naya,” prihatin Garbus.

“Ya am sudah, apakah nang dihualakan badua bedangsanak nitu?” sahut Palui.

Abut jadinya katua RT turun tangan mandamaiakan warganya nang bakalahi, apalagi urang tuhanya sibuk urusan usaha haja. Alasannya aepele haja pang, nang ading handak sapida mutur hanyar saharga 30 juta, nang kakak kada terima, karana abahnya kada cukup duit jua, jalas katua RT mambari tahu kapada Palui sapakawalan wan kapada masyarakat lainnya.

“Ngalih-ai kakanakan wayahni, handak behaharatan haja panampilan, urang tuha makalahan am, bahujan bapanas bausaha mancari duit, nang anak uangkang-ungkang batis haja sambil bajuget di muka tv atau di muka laptop, kaya apa ni kakanakan wayahni?” Palui gagarunum.

“Mama abahnya kaya apa Pak RT?” takun Tulamak.

“Mama abahnya sadih banar. Nang ading manimpas kakaknya nitu bukah kamanakah kada tahu lagi, mungkin ka rumah kawannyakah sambil minum ubat-ubatan aku kada tahu lagi nah! Nang jalas kakaknya dibawa ka rumah sakit , maubati lukanya di pergelangan tangan nitu,” jalas Pak RT mauraiakan ka buhannya.

Imbah bapanderan nitu ada bini Palui datang manamui lakinya. ”Uh abahnya anak kita handak batimpasan jua, nang ading handak manimpas kapada kakaknya, tahual pander?” ujar nang bini tagasa-gasak mahabari laki.

“Ayu lakasi Lui, kita ka rumah ikam mandapati anak,” sigap Pak RT.
Palui pucat muhanya sambil bukah manuju rumah. “Inya sama karas, nang kakak kada hakun bakalah jua wan adingnya, akhirnya ada parang abahnya di dalam kamar, kapiat ha handak ditimpasakannya kapada kakaknya.” jalas nang bini. Ttauling Palui malihat anaknya badua baading nitu handak batimpasan.

“Ni malam Ahad anak-anakku ai, urang bagambira buhan ikam bakalahi bedangsanak, bilang sadang sudah kalakuan!” Palui dasar pucat banar muhanya wan rasa supan ka Pak RT wan warga masyarakat lainnya nang mahurung ka rumah Palui.

“Han jarku Lui kada anak urang haja nang ikam pander batimpasan, sakalinya anak sorang parak banar jua batimpasan, sudah baacungan parang tinggal mariwasakan haja lagi,” sambat Tulamak.

“Ya am anak zaman now jar urang wayahni Mak-ai. Ngalih dituduh ngalih diatur mun kada kahandaknya jua nang diasinya,” Palui masih pucat muha.

“Isuk kena dibawa ka rumah tuan guru abahnya ai,” saran bini Palui.

“Ayuha umanya ai, sip banar saran ikam nitu, aku handak ka rumah tuan guru, minta banyu tawar supaya dingin anak-anakku, kada panasan bila bapanderan badua bedangsanak inya,” ucap Palui kawa lihum sadikit.

Han jarku manusia ni bila kasangharaan hanyar bukah ka wadah tuan guru, tapi bila saat rami betatawaan, tuan guru ditinggalakan.

Renungkan sorang haja dangsanaklah, nang kaya apa baiknya, waktu suka maupun duka jangan lapas kita tuan guru, mailangi sidin. (aan maulana/penulis matan kuta dudul,HSS)

Editor: Didik Trio
Ikuti kami di
KOMENTAR

BERITA TERKINI

berita POPULER

© 2018 TRIBUNnews.com Network,a subsidiary of KG Media.
All Right Reserved