Si Palui

Si Palui : Dihapit Mayat

BANYAK bunus sabanarnya mintuha Palui nang binian Hj Jariah. Sasuatu nang parlu disyukuri umur sidin sudah 76 tahun.

Si Palui : Dihapit Mayat
Bpost/Riza
Ilustrasi Palui 

BANJARMASINPOST.CO.ID - BANYAK bunus sabanarnya mintuha Palui nang binian Hj Jariah. Sasuatu nang parlu disyukuri umur sidin sudah 76 tahun. Masih sigar dia waras haja, kamana-mana sampai bajalan. Bahari basapida ka Bakarung, ka Sungai Raya matan kuta dudul. Wayah ini kada ngalih lagi, bila sidin handak bajalan manyambang bentor, nyuurr.. ka pasar, nyuurr ka Bariang minta banyu tuan guru ka situ rancak haja sidin ya?
“Handak kamana, ma?” rawa Palui.

“Aku hadak ka pasar manukar ruti nagara,” ujar sidin sudah babuat di bentor langganan. Atau sidin handak kamanakah kada kawa ditangat, paling ditakuni haja, handak kamana sampeyan? Bahanu sidin ka rumah anak nang binian, Arsila di Paring Agung situ, ka rumah Palui di kampung Jambu Hulu, rumah sidin saurang di Loklua.

Pukuknya kada taranai saban hari, makanya kada cukup gajih aruah laki sidin, habis darak-darak ka sana ka mari naik bentor ja.”Aku ne dihapit mayat Lui ai?” mintuha Palui manampaiakan gambar sidin waktu di Makkah.

“Apa maksudnya pian, ma?” takun Palui.
“Ayu, ma, pian jangan mambuang perangai,” sahut bini Palui khawatir.
“Kada jua ah, aku naya mambuang perangai, Nak ai?” sahut sidin ka bini Palui.
“Imbah pang apa, jadi pian manguya kaya nitu?” bini Palui maanyaki.

“Cuba lihati gambarku ne batalu kalu, subalah kanan gambar mama Tulamak, sidin sudah lima tahun maninggal dunia, subalah kiri mamanya Garbus, hanyar satahunan ne maninggal dunia, jadi nang jarku dihapit mayat gambarku ini!” ujar sidin lantih.

“Mudahan pian panjang umur, ma ai,”sahut Palui.

Kamarian sidin tulak lagi babentor kada bapadah, dibawa ulih tukang bentor ka Wasah , ka Patigan. Sakalinya sidin jiarah ka kubur mama Tulamak wan mamanya Garbus. Palui dua laki bini mancari ka rumah-rumah kaluarga, ka rumah anak sidin nang lain, kada tadapat jua, tapi untungnya datang haja.

”Kamana Ma, maka pas Magrib hanyar datang?” takun bini Palui.
“Aku datang jiarah kubur, ka kubur mama Tulamak, mama Garbus, napa kaganangan banar wan kawan nang badua nitu, aku parak jua saku manunti,” ujar sidin sarius.

Hinip bini Palui wan Palui. Ngalih sidin nitu dilawani , apalagi pas waktu Magrib sudah, baiknya basyukur haja sidin datang, daripada satakun-takun ka sidin kena bahualan!” Palui bapander dalam hati.

Iya am, Lui ai, bini Palui ai, banyaki basabar haja maharagu urang tuha, kalakuannya bisa mambulik kaya kakanakan pulang sidin. Katuju banar kalu naik bentor, dikira asa baramian haja kaya lagi kakanakan, padahal ai, sakali naik bentor 7.500 rupiah, kalikan ha dalam sabulan, kada cukup gajih pangsiunan laki sidin, Palui lihum saurangan sakalinya imbah tuntung salat Magrib. (aan maulana/penulis matan kuta dudul,HSS)

Editor: Elpianur Achmad
Ikuti kami di
KOMENTAR

BERITA TERKINI

berita POPULER

© 2018 TRIBUNnews.com Network,a subsidiary of KG Media.
All Right Reserved