Si Palui

Si Palui : Pacangan Memakainya

Biar lain pagawai wan kadada bagaji tapi bininya itu katuju haja baurganisasi karna bini Palui itu dasar katuju bakakawanan wan bacari kawan.

Si Palui : Pacangan Memakainya
capture Bpost

BANJARMASINPOST.CO.ID - BINI Palui tamasuk bibinian karir, karna handak saban hari, siang malam bininya itu kadada di rumah haur sibuk di urganisasi. Bahkan tulaknya matan rumah sungsung pada Palui, makanya Palui lah nang maurus kakanakan.

Biar lain pagawai wan kadada bagaji tapi bininya itu katuju haja baurganisasi karna bini Palui itu dasar katuju bakakawanan wan bacari kawan.

"Kalu kaya itu artinya ikam manggantiakan gawian umanya di rumah, tamasuk bamasak, babasuh dan batatapas," ujar Tulamak.
"Aku sakit hati jua Mak ai, rasanya tabalik dunia ini karna taharat bini pada laki," ujar Palui pina sadih.

"Wayah ini zaman emansipasi Lui ai. Ujar urang, zaman gender, parsamaan hak, ibu-ibu makin peduli," ujar Garbus.

"Aku akur haja bini aktif di urganisasi tapi jangan talalu, katarlaluan maninggalakan rumah tangga dan anak buah di rumah karna bila kada kuat iman bisa ba-akibat lupa diri lalu bisa basalingkuh," ujar Palui.

Kada saapa bubuhannya bapanderan itu, bini Palui datang babaju saragam safari bibinian parsis nangkaya bubujuran bibinian karir.

"Ulun bulik satumat haja abahnya ai, maambil daftar kakanakan gasan basunat," ujar bini Palui.

"Bubuhan ikam taumpat maurusi khitanan juakah umanya?" ujar Palui batakun.
"Gawian itu tamasuk pengabdian masyarakat abahnya ai," ujar bini Palui.

"Ooo... kaya itukah umanya, kukira tadi urganisasi bibinian ini hanya urusan aputik hidup, kaluarga barancana, arisan, kasihatan balita, dasawisma," ujar Palui.

"Khitanan ini tamasuk gawian urganisasi kami jua, karna bubuhan lalakian kadada nang manggawinya," ujar bini Palui.
"Itu ngarannya urganisasi saraba bisa dan saraba hakun," ujar Tulamak mamuji bini Palui.

"Kukira memang sebaiknya dan sudah sepantasnya khitanan lalakian ini digawi ulih bibinian," ujar Palui.
"Kanapa maka sebaiknya dan sepantasnya kami nang manggawi?" ujar bini Palui
pina sarik.

"Sabar umanya, sabar umanya, sudah semestinya bubuhan bibinian nang manggawi basunatan ini karna... karna kainanya bubuhan bibinian jua nang cagar nyaman mamakainya," ujar Palui lihum sambil manyirit bininya nang kada kawa bakutik lagi. (emh/rep)

Editor: Elpianur Achmad
Ikuti kami di
KOMENTAR

BERITA TERKINI

berita POPULER

© 2018 TRIBUNnews.com Network,a subsidiary of KG Media.
All Right Reserved