Si Palui

Si Palui: Kada Cangkal

WAYAH badudukan di warung Acil Irus bubuhannya mamanderakan jaman nang sasar tahun sasar basakit. Haraga-haraga makin hari makin balarang.

Si Palui: Kada Cangkal
Bpost/Riza
Ilustrasi Palui 

BANJARMASINPOST.CO.ID - WAYAH badudukan di warung Acil Irus bubuhannya mamanderakan jaman nang sasar tahun sasar basakit. Haraga-haraga makin hari makin balarang.

“Wayah ini aku makan dua kali sahari haja Lui ai,” ujar Tulamak pina marista.

“Bagus haja Mak ai kalu ikam mulai badikit, karna awak sudah tuha baiknya dijaga kasihatan kita jangan talalu manurutakan liur supaya kada kana panyakit kolesterol,” ujar Palui.

“Aku mangurangi makan nasi itu kada marga manjaga kasihatan Lui ai, tapi tarus tarang duit kulihan maujek kada cukup gasan manukarnya,” ujar Tulamak.

“Pantas haja kalingking Tulamak aku lihat pina bahalus,” ujar Garbus mahuluti.

“Cuba kalo abah-uma kita urang sugih, pasti kada cagar sakit hidup,” ujar Tulamak manyasal.

“Ikam tahulah Mak sabujurnya siapa nang salah maka hidup kita sakit nangkaya ini?” ujar Palui manakuni.“

Salah siapa Lui?” ujar Tulamak.

“Sabarataan ini karna salah padatuan wan pakayian kita jua. Padatuan wan pakayian kita bahari kada cangkal,” ujar Palui.

“Hau, kanapa maka ikam mamadahakan bahwa hidup kita kaya ini karna salah padatuan wan pakayian kita Lui. Napa sababnya?” ujar Garbus umpat maanyaki.

“Coba ikam pikirakan, waktu jaman bahari wayah jaman panjajahan Balanda, banyak tanah nang kada batuan artinya kadada nang ampunnya, atawa nang maurusi. Baarti bila kita batanam napa haja pisangkah, gumbilikah atawa bapuku tunggul haja gasan manandai maka tanah itu jadi ampun saurang. Nah karna kabalujuran padatuan wan pakayian kita kada cangkal batanam wan manungguli itulah kanapa makanya kita jadi nangkaya ini, kada jadi urang sugih,” ujar Palui tatawa.

“Hi-ih lah, bujur ujar ikam itu Lui ai. Coba lihati si Utuh Ganal. Wayah ini inya sugih, baduit banar karna hanyar bajual tanah bahektar-hektar warisan matan pakaiannya,” ujar Garbus takurihing imbah paham. (rep/ivd)

Editor: Murhan
Ikuti kami di
KOMENTAR

BERITA TERKINI

© 2018 TRIBUNnews.com Network,a subsidiary of KG Media.
All Right Reserved