Si Palui

Si Palui: Kapolsek

NGARANNYA gin sudah bakawal matan lagi halus, Palui sapakawalan sudah nangkaya dingsanak saurang.

Si Palui: Kapolsek
Bpost/Riza
Ilustrasi Palui 

BANJARMASINPOST.CO.ID - NGARANNYA gin sudah bakawal matan lagi halus, Palui sapakawalan sudah nangkaya dingsanak saurang. Basasambatan nangkaya apa haja kadada nang mamasukakannya ka hati. Nangkaya kamarian tadi wayah mahadang dauh maghrib, bubuhannya karicauan basasambatan imbah itu tatawaan.

"Ujar habar kita baisian Kapolda hanyar pulang, mudah-mudahan kawa mambarantas atawa paling kada mangurangi kariminalisme di banua kita ini," ujar Garbus maungkai kisah hanyar.

"Hi-ih siapa haja urangnya nang manjabat, nang panting kawa mambawa rasa aman wan masyarakat. Karna wayah ini banyak banar paremanisme, parjudian, panambang liar wan panabangan liar alias iligal luging nang harus diberantas," ujar Palui pina musti.

"Ikam itu Lui paragahnya haja manyambat. Coba kalo ikam saurang nang tapilih jadi Kapolda, kada sanyaman mancabut huban di kapala karna sabarataan nang ikam sambat itu sudah maakar," ujar Tulamak.

"Kalo aku diangkat jadi Kapolda nang partama aku gawi adalah maangkat urang-urang nang aku parcaya gasan mambantu gawianku, contohnya nangkaya Garbus aku jadikan Kapolsek," ujar Palui manunjuk Garbus nang langsung takarinyum kahimungan.

"Kalo aku Lui jadi napa, napa jabatanku? Karna aku kawal ikam jua," ujar Tulamak handak jua diangkat.

"Ikam Mak ai wan Tuhirang sabaiknya jadi anak buahnya Garbus haja," ujar Palui.

"Tarima kasih Lui lah, karna sudah mamparcayai aku jadi Kapolsek nang mambantu ikam," ujar Garbus batandik kasukaan.

"Ikam jangan himung dahulu Bus ai. Ikam aku angkat kada karna aku parcaya wan ikam, tapi marga aku malihat wan potongan muha ikam haja karna cocok jadi Kapolsek," ujar Palui pulang.

"Napa hubungannya wan potongan muhaku Lui?" ujar Garbus handak tahu.

"Sabalum aku manjawabnya, aku umpat batakun dahulu wan ikam napa kapanjangan dari Kapolsek itu garang?" ujar Palui batakun.

"Aku kada tahu jua Lui ai," ujar Garbus bageleng kapala.

"Kapolsek nang ini artinya Kapala Longor Hidung Pesek, sasuai haja wan muha ikam itu," ujar palui langsung bukah ka langgar karna dauh maghrib sudah babunyi. (ivd/rep)

Editor: Elpianur Achmad
Ikuti kami di
KOMENTAR

BERITA TERKINI

berita POPULER

© 2018 TRIBUNnews.com Network,a subsidiary of KG Media.
All Right Reserved