Si Palui

Si Palui: Sakaligus Dua

Masalahnya sutil haja, tapi karna ada kaitan wan kuitan, maka Palui sapadangsanakan tapaksa umpat mamikirakan.

Si Palui: Sakaligus Dua
dokumen banjarmasinpost.co.id
Si Palui 

BANJARMASINPOST.CO.ID - PALUI wan ading-adingnya sudah babulan-bulan ini pusang. Masalahnya sutil haja, tapi karna ada kaitan wan kuitan, maka Palui sapadangsanakan tapaksa umpat mamikirakan.

"Aku tamasuk dangsanak tuha nang sudah babini baranakan. Ading-adingku nang sudah jua barumahtangga, tapaksa saban hari barunding," ujar Palui bakisan lawan Gabus.

"Sual napa Lui, apakah sual rumah, sual pahumaan wan sual warisan," ujar Garbus batakun. "Kalu aku tahu, bila kawa kubantu, atawa kucariakan urang lain nang kawa mambari pikiran," ujarnya pulang.

"Sualnya kada sajauh itu Bus ai, tapi sabagai anak kami marasa umpat batanggung jawab. Ikam tahu saurang bahwa uma kami sudah maninggal dunia babarapa tahun lalu, makanya kami sapadangsanakan bagagantian maharagu abah nang sudah tuha itu. Maklum sudah tuha maka sidin tacariwit sadikit, kada kawa salah atawa talambat sadikit haja langsung sidin bamamai," ujar Palui.

"Maklum urang tuha, bahanu mambulik kaya kakanakan minta dilayani macam-macam apalagi sidin rancak pangalumpanan, nang sudah bapadah balum dan nang balum asa sudah," sahut Garbus.

"Tapi kami sapadangsanakan paham haja, maklum haja sidin kalalawasan balu maka kami tawari apakah sidin handak babini. Tanyata sidin katuju banar, tapi kami bari syaratnya supaya bila mancari bini umurnya jangan labih anum pada umur kami, paling sadang umur 50 tahun," ujar Palui.

"Lalu katujulah sidin wan syarat itu?" ujar Garbus.

"Abah kami manyanggupi tapi minta supaya kami jangan umpat campur, artinya sidin mancari saurang wan langsung kawin ka pangulu karna sudah tuha kada parlu ba-acara," ujar Palui.

"Imbah sidin kawin wan pilihan sidin saurang cucuk hajalah wan ikam sapadangsanakan," ujar Tulamak umpat batakun.

"Eeeee... sakalinya, bini pilihan sidin itu anum banar kurang labih 25 tahun umurnya. Makanya kami sapadangsanakan kabaratan karna kada cucuk wan syarat nang kami usulakan paling kada harus baumur 50 tahun," ujar Palui wan ading-adingnya.

"Karna kami protes maka sidin sarik banar, langsung mambawai kami ka kantur pangulu manakunakan bahwa umur bini sidin itu kada 25 tahun tapi bujur-bujur 50 tahun," ujar Palui pulang.

"Lalu kaya apa imbah bubuhan ikam ka kantur pangulu?" ujar Tulamak mahimati batakun.

"Kami sapadangsanakan tapaksa mangalah, karna sidin manang sabab bujur umurnya 50 tahun. Tapi, umur 50 tahun itu kada saurangan haja, karna tanyata sidin sakaligus mangawini dua ikung bibinian masing-masing 25 tahun, jadi 2 x 25 = 50 tahun," ujar Palui kakalahan. (bpost/tam)

Editor: Elpianur Achmad
Ikuti kami di
KOMENTAR

BERITA TERKINI

berita POPULER

© 2018 TRIBUNnews.com Network,a subsidiary of KG Media.
All Right Reserved