Si Palui

Si Palui : Kipas Angin

WAYAH parak puasa tadi, bubuhan urang kampung bagutung-ruyung mangganali wan mambagusi langgar supaya kawa manampung urang banyak.

Si Palui : Kipas Angin
dok
Ilustrasi Palui 

BANJARMASINPOST.CO.ID - WAYAH parak puasa tadi, bubuhan urang kampung bagutung-ruyung mangganali wan mambagusi langgar supaya kawa manampung urang banyak. Biayanya diambil matan sumbangan bubuhan warga baduit wan warga nang handak baamal zariah. Alhamdulillah imbah dibaiki itu, langgar nang biasanya sasak wayah sambahyang tarawih, wayah ini sudah rasa pina ligar.

"Aku basyukur banar bulan puasa ini, langgar kita kawa manampung urang nang handak tarawih kada bakaluaran lagi karna kahibakan jamaahnya," ujar Garbus.

"Hi-ih, kalu dahulu bila talambat turun ka langgar maka harus rela sambahyang sampai takaluar ka jalanan," ujar Tulamak.

"Kada sia-sia, kita uyuh bapapintaan, wayah ini kawa mamutik hasilnya," ujar Garbus.

"Cuma sabuting Bus ai, langgar kita ini kakurangan kipas angin. jadi bila jamaahnya hibak nang kaya bulan puasa ini, maka asa jadi tapai karna kahumapan banar," ujar Tulamak.

"Kalu sual kipas angin, satumat lagi bubuhan kita kada cagar kapanasan lagi, karna kawal kita si Palui ada bakirim surat bahwa tahun ini inya handak bazakat. Zakatnya itu kada dalam bantuk duit tapi sudah ditukarakannya ka kipas angin karna inya tahu bahwa langgar kita bila banyak jamaahnya maka asa panas banar," ujar Garbus.

"Hi-ih kaya apa habar kawal kita si Palui nang sudah babarapa tahun ini madam?" ujar Tulamak.

"Ujar habar wayah ini hidupnya nyaman banar, salawas umpat manjalanakan tuku mintuhanya itu" ujar Garbus.

Kada lawas imbah bubuhannya mamanderakan kabaikan hati Palui nang handak mangirimakan kipas angin gasan langgar di kampungnya, datang tulang pos ma-antar bungkusan paket kiriman matan Palui.

"Ayu lakasi kita bawa ka langgar, kita buka bungkusannya supaya nang tuha-tuha malihat isinya," ujar Tulamak.

Samunyaan ba-ampik kasukaan karna mandapat kiriman kipas angin matan Palui.
"Ayu lihatakanlah kubuka kardusnya," ujar Garbus.

Imbah dibuka samunyaan warga nang manyaksiakan garunuman sambil manyumpah bahwa si Palui wayahini sama haja wan si Palui bahari jua.

"Napa, napa isinya?" ujar Tuhirang handak tahu.

"Si Palui mangirimi kita kipas angin gasan langgar, dikira kipas angin listrik nang bagantung di luteng sakalinya......... ratusan buting kipas angin ulahan Margasari, ujar Garbus.

"Sakali Palui tatap Palui nang luhau mahaluya ujar bubuhannya kasasarikan. (emhati/repro)

Editor: Elpianur Achmad
Ikuti kami di
KOMENTAR

BERITA TERKINI

berita POPULER

© 2018 TRIBUNnews.com Network,a subsidiary of KG Media.
All Right Reserved