Si Palui

Si Palui : Mayat Bejalan

ADA manusia nang dasar pintar bahasa Inggris. Umpama ditakuni langkar apa bahasa Inggrisnya jawabnya pasti beautiful.

Si Palui : Mayat Bejalan
Bpost/Riza
Ilustrasi Palui 

BANJARMASINPOST.CO.ID - ADA manusia nang dasar pintar bahasa Inggris. Umpama ditakuni langkar apa bahasa Inggrisnya jawabnya pasti beautiful. Bahasa Inggris cinta, pasti jawabnya love. Kalau aku cinta ikam pasti I love you.

“Makanya kawanku nang lihai banar bahasa Inggris nitu disambati kakawalan di sakulahan kamus bejalan Bus ai,” ujar Palui ka Garbus bapanderan di gardu.

“Untungnyalah jadi urang pintar ne, banyak dikawani urang. Karna bila kasulitan bahasa Inggris, bukah haja ka wadahnya nitu pasti jawabnya,” sahut Garbus.

“Urang pintar marga katurunan urang tuhanya pintar-pintar saku Lui lah?” takun Tulamak.

“Bisa jadi Mak ai. Tapi nang kutangkap, jadi urang nitu pintar salain katurunan uma abahnya , inya dasar rajin jua balajar. Bahkan jar mama abahnya kada ingat makan. Haur balajar tarus anak sidin nitu,” sahut Palui besemangat.

“Uh jadi palajaran wan buhan kita, rajin balajar kunci supaya pintar. Kadada ah kalu kapintaran bawaan dalam parut mama kita ya?” sanggah Garbus.

“Iya balajar Bus ai,” sahut Palui lagi.

Ngaran Palui wayah ne rajin manuntut ilmu agama wan tuan guru baik di masjid atau ka rumah saurang mandatangi inya, kada jadi masalah maski jauh wan rumahnya.

”Ada sabuting nang parlu jadi parhatian kita berataan, Lui ai,” ujar guru sarius.
“Ada apa maksud pian guru?” takun Palui asa takijat.

“Kalau kisah ikam ada kamus Inggris bejalan, maka kisahku ada jua, mayat bejalan, biasalah mandangar?” guru maulah partanyaan.

“Pucungkah guru atau urang mati jadi hantukah?” takun Palui asa mamburinjing bulu awak.

“Tarsabutlah kisah sahabat Nabi Muhammad SAW nang bangaran Abu Bakar Ash Sihiddiq. Beliau ne urang partama masuk Islam, urang nang partama mangakui kabanaran Nabi. Sidin satiap kali malangkah kaganangan wan mati. Jadi barapa ratus atau ribu langkah sahari, kaya nitu jua sidin ingat akan mati, makanya dingarani urang mayat bejalan. Artinya urang nang salalu ingat wan mati. Kada kaya kita kada ingat akan kamatian. Sudah mancium tanah di dalam alam kubur kena hanyar tahu bahwa aku ne nah sudah mati, sayup sudah …,” kisah guru manciling mata sidin.

“Kita ne banyak lupanya akan mati, asa hidup saumuran, asa anum haja umur, asa rami tarus tatawaan, asa sehat haja awak, jadi pang kada ingat lagi akan mati,iyakah guru?” sambat Palui.

“Makanya aku saranakan sahari nitu paling kada 20 kali ingat akan mati, jadi handak barbuat maksiat ada remnya. Balajur ha handak barbuat taat wan kabaikan haja lagi, karana takutan cagar mati,” nasihat guru kapada Palui.

Sabuting pulang ilmu kulihan wan tuan guru karana rajin bailang ka rumah guru. Apa ya aku handak jadi mayat bejalan jua kaya saidina Abu Bakar, sahabat Nabi SAW, Palui kikiliran banyu mata, ingat inya akan mati. (aan maulana/penulis matan kuta dudul, HSS)

Editor: Elpianur Achmad
Ikuti kami di
KOMENTAR

BERITA TERKINI

© 2019 TRIBUNnews.com Network,a subsidiary of KG Media.
All Right Reserved