Si Palui

Si Palui: Kalambu Burung

PALUI paling katuju baharaguan binatang. Parnah inya baharaguan hayam wan itik, ada pang sampai dua puluh ikung banyaknya.

Si Palui: Kalambu Burung
Bpost/Riza
Ilustrasi Palui 

PALUI paling katuju baharaguan binatang. Parnah inya baharaguan hayam wan itik, ada pang sampai dua puluh ikung banyaknya. Karna kadada baisian halaman ganal maka diulahakannya kandang di bawah barumahan. Tiap baisukan dibukakannya lawangnya lalu hayam wan itiknya itu bacari makan saurang lalu kamariannya hayam wan itik itu pasti bulikan lalu masuk kandang.

Tapi salawas bainguan hayam wan itik di bawah barumahan itu, inya rancak bahualan wan bininya. Bininya kada katuju mancium bau tahi hayam nang naik ka atas abahkan rancak masuk sampai ka kalambu.

"Sabaiknya ikam bakalah haja wan bini ikam Lui ai, karna kautuhan rumah tangga itu labih panting dari pada hobi," ujar Garbus manasihati. "Dari pada bini ikam haur bamamai lalu jadi kalahi, labih baik ikam ampih haja baharaguan hayam wan itik itu," ujar Garbus.

"Jadi imbah ikam ampih baharaguan hayam wan itik, lalu napa gantinya?" ujar Palui.

"Biarpun kada bamudal banyak, cucubaan haja jadi pamburung," ujar garbus.

"Wah, pamburung itu harus gancang mudalnya Bus ai, aku kada sanggup," ujar Palui

"Sudah kuduga ikam pasti salah tangguh, musti mamadahakan pamburung angguta Gapensi. Maksud aku itu maharagu macam-macam burung, baik gasan dijual, dihintaluakan atawa gasan basaung," ujar garbus.

"Ooooooo...... pamburung itukah. Wayahini gawian itu baik banar karna wayah rami urang basaung wan ba-adu bunyi burung," ujar Palui.

"Kaina aku injami kaset gasan malatih burung banyanyi. Ada lagu dangdut, karoncong dan ada jua lagu rok-rok," ujar Garbus.

Akhirnya Palui bainguan burung gasan diadu bunyi. Ada nang ngarannya burung murai batu, burung cucakruwo wan macam-macam lagi jenisnya.

"Nangkaya apa Lui burung ikam? Aku dangar ikam kada ngalang-ngalang manukar, puluhan ikung sakaligus. Bulihlah aku umpat malihat?" ujar Garbus

"Burung nang kulatih banyanyi gasan ba-adu bunyi itu kurungannya kuandak di balakang rumah karna kada bulih taganggu wan bunyi lainnya. Kalu ikam handak malihat ayu kita kabalakangan," ujar Palui mambawai Garbus. Imbah sampai dibalakang rumah, Garbus malihat puluhan buah kurungan burung Palui. Samunyaan dikalubuti wan kain.

"Rupanya ikam sudah pintar baharaguan burung, kada usah aku padahi lagi," ujar Garbus.

"Hiih, Ku kalambui supaya burung itu tapusat pikirannya wan lagu dan kada tapangaruh suara atawa pamandangan luar," sahut Palui.

"Baik banar kalambu panutup kurungannya ini, macam-macam balang dan putungan kainnya. Di mana ikam mamasan dan manjahitnya maka pas banar wan kurungannya," ujar Garbus.

"Huusss...... jangan nyaring batakun kalambunya. Karna kalambu-kalambu kurungan burung itu adalah baju rok biniku," ujar Palui sambil mambari tanda jangan bapander nyaring.

"Waahhhhh, pantas haja kudangar ikam wan bini ikam masih haja bahualan. Malah wayah ini bilang handak saban hari. Rupanya baju rok bini ikam nang ikam pakai gasan mangalambui burung," ujar Garbus bakuling kapala. ivd/mht

Editor: Didik Trio
Ikuti kami di
KOMENTAR

BERITA TERKINI

© 2019 TRIBUNnews.com Network,a subsidiary of KG Media.
All Right Reserved