Si Palui

Si Palui: Angguta Tim Kesebelasan

PALUI wayah musim main bal bahari jarang banar ada di banua. Paling saminggu inya cangul, minggu kainanya hilang pulang.

Si Palui: Angguta Tim Kesebelasan
capture/banjarmasin post
Si Palui Pagat Tali Salawar 

PALUI wayah musim main bal bahari jarang banar ada di banua. Paling saminggu inya cangul, minggu kainanya hilang pulang. Imbah ditakuni ka bini Palui, lakinya itu rancak umpat rumbungan kasabalasan Barito Putera. Kada parcaya jua bubuhannya mandangarnya, apalagi Palui itu kada tapi kawa bukah laju karna batisnya pilai.

"Itu Paluinya datang, takuni Bus napa gawiannya maka inya rancak kadada di banua," ujar Tulamak.

"Ui Lui, kamana haja ikam maka jarang banar talihat di banua?" ujar Garbus.

"Aku jadi angguta tim, angguta rumbungan hingga dibawa ka mana-mana," sahut Palui.

"Tim napa Lui?" ujar Tulamak.

"Bubuhan ikam ini kada mambaca surat kabar, makanya kada tahu gawianku. Aku umpat ka Gersik, ka Bali, ka Kaltim, kaina ka Makassar, mudahan sampai ka Jakarta," ujar Palui pina himung.

"Ooo... jadi ikam umpat rumbungan bubuhan main bal itukah? ujar Garbus.

"Nah, pas banar tangguhan ikam Bus ai. Sabujurnya aku sudah uyuh banar tapi karna diharuskan umpat maka tapaksa ai umpat tarus karna kadada panggantinya," ujar Palui.

"Di kesebelasan itu ikam pamain bagian mana Lui, apakah panjaga gol, bek atawa gelandang?" ujar Tulamak.

"Aku di bagian pertahanannya" ujar Palui.

"Di bagian pertahanan itu artinya ikam bek kiri atawa bek kanan," ujar Garbus manangguh.

"Salah tangguhan ikam itu Mak ai, nang bujur aku di bagian pertahanan kasihatannya," ujar Palui.

"Rasa kadada di dalam kesebelasan ada pertahanan kasihatan," ujar Tulamak malecehkan.

"Kalu aku kadada, kasihan bubuhannya ringkutan awak apalagi nang tasalihu, bincul atawa bangkak," ujar Palui.

"Hahahaaa... paham, aku paham. Palui angguta tim kesebelasan sebagai ‘pertahanan kasihatan’ karna tugasnya adalah sebagai ‘tukang urut alias tukang pijat’ bubuhan pemain bal itu," ujar Garbus mangalakak tatawa. emhati.(repro)

Editor: Didik Trio
Ikuti kami di
KOMENTAR

BERITA TERKINI

© 2019 TRIBUNnews.com Network,a subsidiary of KG Media.
All Right Reserved