Si Palui

Gawian Ikut Suami

PALUI tapilih pulang manjadi katua RT. Padahal inya sudah dua kali manjabat, tapi karna urang banyak nang katuju tautama bubuhan pamudanya

Gawian Ikut Suami
Dok Banjarmasin Post
Si Palui 

BANJARMASINPOST.CO.ID - PALUI tapilih pulang manjadi katua RT. Padahal inya sudah dua kali manjabat, tapi karna urang banyak nang katuju tautama bubuhan pamudanya, jadi tapakai pulang. Palui urangnya pangawal wan jua saraba rasuk wan urang kampung, baik nang tuha atau pun nang anum.

"Bujurkah Lui bila handak jadi pajabat harus baisian bini," ujar Garbus batakun.

"Hi-ih bujur Bus ai, pajabat harus baisi pandamping gunanya supaya jangan makan nasi bungkus," ujar Palui lihum.

"Napa hubungannya antara babini wan nasi bungkus Lui, aku kada paham," sahut Garbus.

"Kalu baisian bini artinya kada layau ka hulu ka hilir karna sudah ada wadahnya. Tapi bila kada baisian bini maka tapaksa makan nasi bungkus, artinya imbah dimakan maka daunnya kada dipakai lagi lalu dibuang," ujar Palui.

"Ooo... kalu kaya itu aku akur Lui ai bahwa pajabat itu harus babini," ujar Garbus paham napa maksud Palui.

"Makanya, mulai tadi kusambat bahwa pajabat itu parlu pandamping. Dan, pandamping itu adalah bini," ujar Palui.

"Ooo... pantas haja imbah dilantik jadi katua RT dahulu, bini Palui kada mau tapisah wan lakinya. Ibarat paribahasa di mana ada gula di situ ada samut, di mana ada Palui, pasti di situ ada bininya," ujar Tulamak.

"Karna salalu didampingi bininya itulah maka Palui jadi alim banar kaya siput dipais," ujar Garbus.

"Aku kada cuma mandampingi lakiku karna inya jadi katua RT," ujar bini Palui nang hanyar datang umpat manyahut karna kada tahan disindir Garbus.

"Kalu kada karna kaharusan mandampingi laki sebagai katua RT lalu karna napaaa?" ujar Tulamak manggasak.

"Aku harus mairingi lakiku kamana pun inya tulak karna dalam KTP kartu tanda panduduk-ku tatulis bahwa pakarjaanku adalah ikut suami, makanya ka mana-mana lakiku tulak harus kuumpati," ujar bini Palui kada hakun kalah.

"Kami paham, kami paham bini Palui ai. Supaya ikam di higa Palui kalihatan pina bapangaruh sebagai bini pajabat maka jangan kada ingat mamasang kacamata hirangnya dan lihum sadikit, jangan marangut," ujar Garbus mahuhulut. emhati(repro)

Editor: Didik Trio
Ikuti kami di
KOMENTAR

BERITA TERKINI

© 2019 TRIBUNnews.com Network,a subsidiary of KG Media.
All Right Reserved