Si Palui

Si Palui: Bagawi DPR

PALUI bujur haja urangnya rajinan tapi ada sabuting kakurangan inya, amun bagawi kada mau tugul alias kada mau awet, rancak bapindah-pindah gawian.

Si Palui: Bagawi DPR
dok
Ilustrasi Palui 

BANJARMASINPOST.CO.ID - PALUI bujur haja urangnya rajinan tapi ada sabuting kakurangan inya, amun bagawi kada mau tugul alias kada mau awet, rancak bapindah-pindah gawian. Mungkin karna rancak baganti gawian itu makanya Palui kada mau sugih atawa baduit nangkaya urang.

Inya biasa jadi karnit mutur, jadi supir mutur padesaan, jadi pambalijaan, jadi tukang ujek, jadi pasuruh kantur dan sawat jua jadi staf pambantu umum pambakal. Tapi samunyaan gawian itu paling kawa batahan satahun, imbah itu inya muyak saurang lalu baugah manggawi nang hanyar pulang.

"Napa alasan ikam maka rancak ba-ampih gawian itu Lui?" ujar Tulamak.

"Aku rancak ba-ampih dan bapindah-pindah gawian itu karena aku pamuyakan Mak ai. Sual pandapatan sabujurnya cukup haja gasan pamakan dan tapih anak bini," ujar Palui.

"Jadi kalu kaya itu napa alasan nang paling utama maka kada kawa tatap sabuting gawian haja," ujar Garbus.

"Aku paling katuju gawian manyaurangan alias mandiri, kada kawa bagawi dibawah parintah urang lain. Sakit hatiku bila mandangar nang mamarintah itu pina nyaring suaranya dan pina manyanyarik. Sabaliknya kalu kawa justru akulah nang mamarintah urang lain," ujar Palui ba-agak.

"Wayahini ngalih banar mancari gawian nang kada dibawah parintah urang lain," ujar Tulamak.

"Balum tantu ngalih Mak ai, buktinya aku kawa haja bagawi saurangan kada dibawah parintah urang lain," ujar Palui.

"Jadi wayahini ikam bagawi di mana?" ujar Garbus.

"Aku manarusakan gawian aruwah kayiku, aku bagawi DPR," ujar Palui pina musti.

"Ampun maaf Lui-lah, kulihat ikam kadada putungan angguta DPR, di sana urang harat-harat, batitel, bagalar, bapangkat dan samunyaan itu urang pulitik. Sedangkan ikam tamasuk urang buta kakap, picak pulitik. Mana mungkin? Aku tarus tarang haja kada parcaya," ujar Garbus.

"Ooo ... jadi ikam bagawi di DPR-kah?. Di DPR mana, apakah di prupinsi atawa di kabupaten?" ujar Tulamak ma-anyaki.

"Itu di DPR parak pinggir sungai," sahut Palui.

"Kadada kantur DPR di pinggir sungai," ujar Garbus mangaramputakan.

"Itu dipinggir sungai ada kalu puhun ganal, di situlah aku bagawi. Aku bagawi DPR alias Di bawah Puhun Rindang sebagai tukang gunting rambut," ujar Palui mangalalak tatawa mangalahakan bubuhannya. (ivd/mht)

Editor: Elpianur Achmad
Ikuti kami di
KOMENTAR

BERITA TERKINI

© 2019 TRIBUNnews.com Network,a subsidiary of KG Media.
All Right Reserved