Si Palui

Si Palui : Nyamannya Tahu

BUBUHAN Palui, Garbus wan Tulamak tapaksa singgah di warung nang murah wayah bajajalanan ka Banjar.

Si Palui : Nyamannya Tahu
Dok Banjarmasin Post
Si Palui : Nyamannya Tahu 

BANJARMASINPOST.CO.ID - BUBUHAN Palui, Garbus wan Tulamak tapaksa singgah di warung nang murah wayah bajajalanan ka Banjar. Sababnya, bubuhannya sudah kahabisan duit imbah batatukar macam-macam, tamasuk pasanan anak wan bini.

"Supaya kita ada ungkus bulik maka kita makanan di sini haja lawan bajanji mamasan makanannya jangan nang larang, iwaknya cukup tahu wan tempe haja. Bulih batambah tapi nasinya haja kada bulih batambah iwaknya," ujar Palui mambawai masuk ka warung.

"Bulih lah Lui kalu aku mamasan hayam babanam?" ujar Tulamak managuk liur malihat urang mambanam hayam.

"Kada bulih, hari ini kita makan tahu wan tempe haja. Kalu handak hayam babanam boleh ai tapi baunya haja," ujar Palui.

"Kalu hintalu masak habang Lui, bulihlah?" ujar Garbus umpat batakun.

"Kada bulih jua, karna sabarataan makanan nang bubuhan ikam sambat itu mangandung kolesterol kada baik gasan kasihatan. Amunnya tahu wan tempe, salain rasanya nyaman wan banyak pitamin wan proteinnya," ujar Palui panahunya.

Imbah mamasan makanan lalu bubuhannya bahimat mambantas. Tulamak batambah nasi talu kali karna kanyanyamanan makan bapalit kecap wan sambal acan, biar iwaknya tahu wan tempe haja.

"Ayu Bus tambah lagi nasinya," ujar Palui manyuruh Garbus.

"Kaina hulu, kaina hulu," ujar garbus sambil basasiul kapadasan.

"Nangkaya apa Mak, nyaman haja kalu makan wan tahu-tempe?" ujar Palui manakuni Tulamak nang matan tadi tapaluh kanyamanan.

"Nyaman banar, asa kada handak baampih. Tahunya lamak wan sintal," ujar Tulamak.

"Ikam tahu lah Bus, tahulah Mak, bahwa tahu ini nyaman kalu?" ujar Palui pulang.

"Hi-ih nyaman banar," ujar tulamak wan Garbus taimbai.

"Bubuhan ikam tahu lah, tahu ini nyamannya dimana? ujar Palui batakun pulang.

"Tahu ini nyaman karna lamaknya apalagi bila bapalit sambal acan," ujar Garbus manjawab.

"Jawaban ikam itu mangarut Bus ai. Ikam Mak napa jawaban ikam, dimana nyamannya tahu ini," ujar Palui.

"Tahu ini nyamannya dikecapi wan bila mamakannya muntung kita bakicap," ujar Tulamak.

"Jawaban bubuhan ikam itu salah samunyaan. Nang bujur tahu ini nyamannya di u-nya," ujar Palui.

"Hau kanapa maka di u-nya, napa alasannya. Pasti jawaban ikam ini mangalabuau pulang," ujar Garbus.

"Pasti haja di u-nya, coba bila u-nya ikam ganti pasti kada nyaman," ujar Palui sambil tatawa.

"Aku paham, aku paham," ujar Tulamak umpat tatawa. Amun u-nya diganti awan i, pasti kada nyaman lagi wan pasti babau karna bacaannya lain tahu lagi tapi tah.... hup!" Tulamak handak manyambat tapi kada jadi karna muntungnya sudah ditutupi ulih Palui. (ivd)

Editor: Didik Trio
Ikuti kami di
KOMENTAR

BERITA TERKINI

© 2019 TRIBUNnews.com Network,a subsidiary of KG Media.
All Right Reserved